Keńes Úkimeti syrtqy eldermen baılanysta óte saq bolǵany belgili. Shet elge barǵan árbir azamat jáne syrttan kelgen ár adam jiti tekseriletin. 1985 jyly Brıtanıanyń qazirgi premer-mınıstriniń Keńester Odaǵyna sapar shegýine qatysty «Komsomolskaıa Pravda» basylymynyń sholýshysy Evgenıı Chernyh jazýshy Gennadıý Evgenevıch Sokolovpen júrgizgen suhbatynda aıtylady. Kezinde Ulybrıtanıada qyzmet istep, saıası taqyrypta eńbekter jazǵan G.E.Sokolov jas Kemeronnyń sol saparyna qatysty biraz muraǵatty aqtarǵan kórinedi.
1985 jyly jazda Iton kolejin bitirgen Devıd Kemeron dosy Entonı Grıffıtpen birge KSRO-ǵa qydyryp keledi. Bul sapary jóninde Kemeronnyń ózi keıin «Bı-Bı-Sı»-ge bergen suhbatynda aıtqan. Kemeron dosymen birge Lenıngrad, Ialta, Kıev, Kıshınev sıaqty qalalardy aralaǵan.
G.N.Sokolovtyń aıtýynsha, 1920-30 jyldary Brıtanıa arnaıy qyzmeti bolashaq saıasatkerlerdi synaý úshin osyndaı «saıahatqa» jiberip otyrǵan. Synaqtan ótýshiniń qasynda tájirıbeli tyńshy bolǵan. Sapar sońynda ony qandaı qyzmetke laıyq ekendigi týraly belgili bir nátıje shyǵarylǵan. Máselen, Ulybrıtanıanyń bolashaq qorǵanys mınıstri Dýnkan Sands (Ýınston Cherchılldiń kúıeý balasy) Syrtqy ister mınıstrliginde jumysyn bastaǵan kezde osyndaı «saıahatqa» shyǵyp, barlaý qyzmetiniń synaǵynan ótken. Synaqtan sátti ótkendiginiń belgisi Dýnkan tyńshylyq qyzmette de, saıasatta da bedeldi tulǵaǵa aınaldy. Kemeron KSRO-daǵy Ialtada «demalǵanda» aǵylshyn tilin jetik biletin orys azamaty onymen tanysý arqyly qandaı maqsatpen kelgenin teksermek bolǵan. Alaıda Kemeronnyń óz saparynyń búge-shigesi týraly eshqashan ashyp aıtpapty. Tipti KSRO-da demalǵan sátterinen sýretteri de saqtalmapty. Ol KSRO-ǵa sapary týraly Konservatıvtik partıanyń jetekshisi qyzmetine kiriskennen keıin biraq jarıalaǵan. Kemeronnyń saıasat jolynda kedergisiz ósýine KSRO-da KGB-ǵa «ustalmaı», aman-esen oralýy negiz bolsa kerek. 2010 jyly úkimet basyna kelgen Kemeron 200 jyl ishinde Brıtanıanyń tuńǵysh jas premer-mınıstri retinde belgili.
Daıyndaǵan Dana Qamshybek
