Zańger Jangeldi Súleımenov názik jandylardyń jumys ýaqytyn qysqartýdy usyndy dep habarlaıdy «Qamshy» aqparattyq agenttigi. Zańger óziniń facebook paraqshasynda «Áıelderdi qorǵaıyq» ataýymen qazaqstandyq áıelderdiń jumys saǵatyn qysqartýdy usyndy.

«Qazaqstandyq áıelderdiń  jumys kúni 18 saǵattan turady. Onyń ishinde demalys, mereke joq. Áıelder tań atpastan otbasyna tańǵy as daıyndaıdy. Odan keıin balalaryn balabaqshaǵa, mektepke aparady. Osy isterdi atqarǵannan keıin saǵat 9-dan 7-ge deıin jumysta otyrady. Odan shyǵa sala úı jınaý, kir jýý, balalarynyń oqýyn qadaǵalaý taǵysyn taǵylar. Ábden sharshaǵan áıel túngi 12-de jatyp, tańǵy 6-da qaıta turady. Barlyǵy qaıta bastalady. Al demalys kúnderi jumys kúnderinen de qıyn. Áıelderdiń ómirin jeńildetý úshin olardyń jumys saǵatyn 7 saǵatqa qysqartýdy usynamyn. Al juma kúni túske deıin ǵana jumys istesin. Jumys ýaqyty bitkende áıelge qosymsha tapsyrma berip,  jumysta otyrýǵa májbúrleýge tyıym salý qajet. Mundaıǵa kóbine memlekettik mekemeler barady. Áıeldi jumys ýaqyty bitkennen keıin de jumys isteýge májbúrlegen basshylardy ornynan bosatý kerek. Osy bos ýaqytta áıel barlyǵymyzdan demalsyn» dep jazdy Jangeldi Súleımenov.