Qoǵamdyq densaýlyqty qorǵaý komıtetiniń tóraǵasy – Qazaqstannyń bas sanıtarlyq dárigeri Jandarbek Bekshın Qaraǵandyda aýyzasharda ýlanǵandardyń jaǵdaıy týraly aıtty.
Bekshınniń aıtýynsha, 30-ǵa tarta adamdy aýyzasharǵa shaqyrǵan úı ıeleri azyq-túlikti saqtamaǵan. Qonaq kútýge birneshe kún buryn daıyndalǵandyqtan táttilerdi salqyn jerge qoımaǵan. Al tańerteń pisken et keshki toǵyzǵa deıin turǵan. Dáriger osyndaı sebepterdiń saldarynan qonaqtar ýlanǵan bolýy múmkin deıdi.
Ári tekseris kezinde pisirilgen ettiń túsi jasyl, ıisi jaǵymsyz bolǵan kórinedi.
Aýrýhanaǵa 20 adam túsken eken, onyń tórteýi - balalar. Dárigerdiń aıtýnysha, naýqastarǵa qatysty tıisti sharalar qoldanylyp jatyr.
Aıta keteıik, Qaraǵandyda osydan úsh kún buryn aýyzasharǵa barǵandar búginde aýrýhana tóseginde jatyr. Barlyǵy da sol otyrystan keıin ózderin jaısyz sezinipti. Eresekterdiń aǵzasy alǵashynda syr bermese, kishkentaı balalardyń birden ishi ótip, ystyǵy kóterilgen. Jansaqtaý bóliminde jatqan kishkene balalardyń jaǵdaıy turaqty túrde aýyr dep baǵalanyp otyr. Bárine tıisinshe em-dom jasalyp jatyr eken.