BQO-da H.Bókeeva atyndaǵy Batys Qazaqstan oblystyq drama teatrynda "Azamattyq bastamalardy qoldaý ortalyǵy" men QR Qoǵamdyq damý mınıstrligiń qoldaýymen "Adyrna" ulttyq-etnografıalyq birlestigi júzege asyrǵan Qazaqstan jastaryn áleýmettendirýge baǵyttalǵan JasQZ jobasyn qorytyndylaý boıynsha saltanatty shara ótti.

JasQZ jobasy aıasynda uıymdastyrylǵan "Meniń tańdaýym" baıqaýy 6 baǵyttan ("Ulttyq qundylyq", "Áskerı-patrıottyq", "Zıatkerlik", "Shyǵarmashylyq", "Áleýmettik belsendilik", "Sporttyq") turdy. Onda Batys Qazaqstan oblysynyń 9-11 synyp oqýshylary men joǵary oqý orny stýdentteri 6 baǵyttyń birin tańdap, ózara básekege tústi.

Qorytyndy sharaǵa "Azamattyq bastamalardy qoldaý ortalyǵy" basqarma tóraǵasynyń orynbasary Oralova Gúlnar Álimjanqyzy arnaıy kelip qatysyp, quttyqtaý sóz sóıledi. Baıqaý jeńimpazdaryn elimizge belgili Ámirjan Qosanov, Rasýl Jumaly syndy qoǵam qaıratkerleri tabystady. Osy oraıda saıasatker Ámirjan Qosanovtan shara jaıly pikirin bildik.

- JAS.QZ jobasy nesimen erekshe?
- Bul jobada zaman talaptaryna saı kóptegen krıterıılerdi kórip otyrmyn: jańashyldyq, kreatıvtilik, tabıǵılyq. Maǵan, ásirese, jobanyń aýyl-aımaqtyq sıpaty erekshe unady: joba ókilderi oblystyń barlyq aýdandaryna óz aıaǵymen baryp, talmaı-sharshamaı aralap, jastar arasynda irikteý jumystaryn júrgizgen! «El ishi – talant kenishi» ekenin eskersek, mundaı bastama asa qundy ári memlekettik saıasatty jastarǵa jaqyndata túsedi!

- Jastardy áleýmettendirý boıynsha qandaı sharalar uıymdastyrýǵa shaqyrar edińiz?
Alty baǵyt boıynsha synaqtar ótkizýdiń ózi ne turady! "Áleýmettendirý" degen men úshin, eń aldymen, qazirgi, qıyn-qystaý, bilim alý men jumys tabý sekildi sharýanyń meılinshe kúrdelenip ketken zamanǵa beıimdelý, «zamanyń túlki bolsa, tazy bop shal» prınsıpiniń naqty túrde júzege asyrylýy. Sondyqtan da naqty mamandyqqa, naryqtyq ekonomıkanyń ómirde kezdesetin talaptaryna qatysty synaqtar men baıqaýlardy kóbeıtý kerek dep oılaımyn. Ásirese, ǵylym men bilim, jańa tehnologıalar men zamanaýı mamandyqtar men kásipterge arnalǵan tustaryn kóbirek nasıhattap, jastarǵa jaqyndata túsý qajet dep sanaımyn.

- Oblystyq deńgeıde ótken pılottyq jobanyń oń jáne teris tustary qandaı?
- Oń tustaryn aıttym, al kózge uryp turǵan teris tustaryn baıqamadym. Ony jobanyń basy-qasynda júrgen, mán-mánisine tereń boılaǵan azamattar biletin bolar.
Bir usynys qana aıta alamyn. Sóz joq, oblystyq ákimshilik jobaǵa qoldaý kórsetipti. Onysyna rahmet! Aýdandardaǵy ákimshilik mamandaryna alǵysyn aıtyp, olardy marapattaǵan «Adyrna» qory da jarady. Biraq oblys ortalyǵyndaǵy teatrda ótken qorytyndy keshke oblys ákimshiliginen resmı tulǵalar kele qoımady. Bálkim, olardyń shynymen de qoly tımegen shyǵar. Biraq, oblystyń túkpir-túkpirinen kelgen jastardyń aldyna shyǵyp, bir aýyz jyly sózderin aıtqanda, qatyp keter edi! Bıliktiń beledi de artar edi.

- Elimizde áleýmettendirý deńgeıine qandaı baǵa berer edińiz?
- Bul ózi óte-móte qıyn suraq. Bir nárse anyq: bizdiń memleket Konstıtýsıa boıynsha «áleýmettik memleket». Sondyqtan da qoǵamnyń barlyq toptarynyń – jas bolsyn, orta býyn bolsyn, zeınetkerler bolsyn – áleýmettenýine, ıaǵnı jańa zamanǵa beımidelýine memleket tikeleı jaýapty. Óz basym memleket osy mısıasyn tolyq máninde atqaryp jatyr dep aıta almaımyn! Sonymen qatar, tek qana memleketke qarap qalýǵa bolmaıdy: qoǵam, árbir azamat óz belsendiligin tanytýy shart. Sonda ǵana shyn mánindegi ári jemisti áleýmettený júzege asady dep sanaımyn!

Jalpy, jobanyń úzdik shyqqan júzdikterine arnaıy tiktirilgen kúresheler, kýálikter, tósbelgiler taratyldy. Sonymen birge, olarǵa mádenıettanýshy, etnograf Berdaly Ospannyń "Qazaq salttarynyń injý-marjandary" atty kitap syıǵa tartyldy. Qazaqstan jastaryn áleýmettendirýge baǵyttalǵan JasQZ jobasyn qortyndylaý boıynsha saltanatty shara barysynda júzege asyrýǵa belsendi at salysqan maman, qyzmetkerler de marapataldy.