1942 jyly 2-maýsymda dúnıege kelgen belgili jazýshy, jadtyń áleýetin arttyrý baǵytynda jumys jasaǵan ǵalym, júzdegen kitaptardyń avtory jáne avtorlar alqasynyń múshesi Tonı Búzan ústimizdegi jyldyń 13-sáýirinde ómirden ozdy.

Búzen Londondaǵy Kıtsılano mektebiniń túlegi bolyp esepteledi. Orta mektepti támámdaǵan soń Tonı psıhologıa, aǵylshyn tili, jalpy ǵylym jáne matematıka baǵyttary boıynsha Kolýmbıa ýnıversıtetine eki dıplom jeńip alady.

Tonı Búzen «Ózińdi oılaýǵa úıret» atty kitaby arqyly kópshilikke tanymal. Kitapta mıdyń jumys jasaý júıesi men «jad kartasy» tásili sóz bolady.

2006 jyly jeltoqsan aıynda «jad kartasyn» qoldaý maqsatynda iMindMap atty baǵdarlama jasaldy.

VVS arnasyndaǵy serıalyq baǵdarlamalardan keıin Búzenniń ıdeıalary men keskin-kelbeti kúlli ǵalamǵa máshhúr boldy. Tipti, ol aıtqan ıdeıalardyń salmaǵy bes kitapqa júk bolypty-mys. Olar: «Óz jadyńyzdy paıdalanyńyz», «Este saqtaý qabiletińizdi damytyńyz», «Ózińdi oılaýǵa úıret», «Jyldam oqýdyń joldary» jáne «Jad kartasy» týraly kitap».

Tonı Búzen mıdyń jalpy fýnksıasynyń keń aýqymda jumys jasaýyn, este saqtaý qabiletin arttyrý joldaryn, oqý júıesin, shyǵarmashylyq úderisti, jasamys jandarǵa jadtyń múmkinshiligin arttyrý joldaryn zerttep, osy baǵyttarda dárister ótkizdi.

Álemge tanymal psıholog mı men onyń jumysy, rýhanı ıntellekt, jad, alabóten oılaý jáne jyldam oqý týrasynda teńdessiz dúnıeler jazdy. Onyń avtorlyǵy bar júzdegen eńbekter búginde ǵalamnyń burysh-buryshynda oqyrmannyń qyzyǵýshylyǵyna ıe.

Avtordyń ǵalam jurtshylyǵyna tanymal eń úzdik tórt kitaby:

1. «Jad kartasy. Emtıhanǵa daıyndyq»

2. «Intellekt pen jadty damytýǵa basshylyq. Bilim alýdyń eń qysqa joly»

3. «Sýper-jad. Jadty damytý men jetistikke qalaı tez jetýge bolady?»

4. «Balańyzdyń tabıǵı danyshpandyǵyn ashyńyz»

Álemdik deńgeıdegi tulǵanyń bizdiń elde de shákirtteri bar eken. Ustaz tutyp, psıhologtan bilim alǵan qandastarymyzdyń biri – Búkilálemdik Jad chempıonatynyń treneri Asylzat Múlkibaeva.

Asylzat Múlkibaeva jyldam oqý, jad, MindMap boıynsha Tonı Búzenniń batasyn alǵan, Tonıshe dáris berýge ruqsaty bar sertıfıkattalǵan treneri-shákirti bolyp sanalady.

«Meniń ustazym – Tonı Búzen 76 jasqa qaraǵan shaǵynda dúnıeden ozypty.

Ol árdaıym búkil álemde jyldam oqý saýattylyǵyn arttyrýdy qalaıtynyn aıtatyn. Osy jolda biz onyń aqyldy ári saýatty jaýyngerleri ekenimizdi jasyrmaıtyn.

Intellekt-kartasyn jasaý arqyly ol mnemotehnıka salasynyń damýyna úlken úles qosty. Kópshilik bile bermeıdi, bizdiń ustaz ejelgi grekterdiń este saqtaý tehnıkasyn jańǵyrtqan edi. Sondaı-aq, Búkilálemdik Jad chempıonatynyń negizin qalady.

Men osyndaı adammen jolyǵyp, osyndaı tulǵadan bilim alǵanyma dánrızamyn. Onyń kózdegen mısıasy odan ári jalǵasa beretinine senimdimin», -dep jazdy Asylzat Múlkibaeva óziniń ınstagram paraqshasynda.