Shyǵys emi, hıdjama, súlik salý sekildi shıpa túrleri sońǵy jyldary beleń ala bastaǵan. Osy úrdis damyǵan saıyn tutynýshylar talaby da arta tústi. "Halyq qalasa, han túıesin soıady" degen támsil bar. Eldiń qalaýymen, jurttyń jappaı suranysymen Almatyda ashylǵan "Rashmed" shyǵys medısınasy ortalyǵynyń lenta qıý rásimine Qamshy.kz aqparat agenttiginiń tilshisi arnaıy baryp qaıtqan edi.
"Bizdiń maqsatymyz – batys medısınasyndaǵy antıbıotıkpen emdeý, ekpemen, hımıalyq dári-dármektermen emdeý sekildi shıpagerlikti shekteý. Qazaqtyń tán saýlyǵy úshin qyzmet etý", - dep bastady jıyndy atalmysh medısına ortalyǵynyń bas dárigeri Rashhan Sydaıqyzy.
Merekelik qoıylymnan...
...Almaty qalasynyń Alataý aýdanynda ornalasqan keń aýladaǵy eńseli úıge kirip bardyq. Esik aldynda ornalasqan kishigirim sahna, jaǵalaı qoıylǵan oryndyqtar men jaıylǵan dastarhannan toıdyń ıisi ańqyp turǵandaı.
"Toı dese qý bas domalaıdy" demekshi, shaqyrylǵany bar, dúrmektiń dúbirin arttyrýǵa suranyp kelgeni bar bir qaýym eldiń qarasy jıyldy. Tizgin estradamyzda bedeli bar, elge áıgili "Jigitter" kvartetiniń ánshisi Baǵlan Ábdiraıymovtyń qolynda.
Jıyn "Rashmed" medısınalyq ortalyǵynyń ashylý saltanaty bolsa da, onyń basty ereksheligi – alda kele jatqan Ekinshi dúnıejúzilik soǵysynyń 74 jyldyq mereıtoıyn eskerýinde edi. Alataý aýdanynyń eńbek jáne tyl ardagerlerin arnaıy shaqyrtqan ortalyq ıeleri keń darıa qarttardyń aq batasyna, ystyq lebizine bólendi.
Alataý aýdandyq ardagerler alqasynyń tóraǵasy Qudaıbergen Qabdýldın bastaǵan aqsaqaldar Rashhan Sydaıqyzyna alǵys bildirip, jasaǵan jumysyna, kótergen bastamasyna aq jol tiledi.
Sahnada el rýhyn kóterip, shat-shadyman kóńil-kúı syılaıtyn ánder oryndaldy, kúı shertildi. Osyndaı kishigirim merekelik qoıylymnan keıin ashylý saltanatynyń resmı rásimine de kezek keldi.
Álginde ǵana sóz sóılep, aıtýly jıyndy ashyp bergen qurmetti qonaq – Altaý aýdandyq ardagerler alqasynyń tóraǵasy Qudaıbergen Qabdýldın "Rashmed" shyǵys medısınasy ortalyǵynyń lentasyn qıdy.
"Rashmed" ardagerlerge qurmet kórsetti
Qartyn syılaǵan eldiń azyp-tozbasy, bata alǵan urpaqtyń baqytty bolary anyq qoı. Qytaı usynǵan qomaqty qarjyny tárk etip, atajurtqa qonys aýdaryp kelgendegi Rashhannyń maqsaty da osy – qandastarynyń tánine Alladan shıpa surap, sol shıpaǵa sep bolý.
Jeńis kúni qarsańynda óz esigin aıqara ashqan medısınalyq ortalyqtyń ıeleri aýdan ardagerlerin syı-sıapatsyz qaldyrmady.
Eńbek jáne tyl ardagerleriniń beli aýyryp, baltyry syzdaı qalsa, qyzmetke daıar ekendikterin kórsetip, baǵa jeńildikterin, ıaǵnı, jeńildik sertıfıkattaryn berdi. Munda aptanyń juma kúnderi soǵys ardagerlerine, eńbek jáne tyl ardagerlerine naýqastarynyń deńgeıine qaraı tegin emdeý, túrli jeńildiktermen emdeý sıaqty joldary qarastyrylǵan.
Qarttardyń kóńiline jaqyn júretin azamattardyń bastamasyna elge sóz aıtatyn, kónekóz qarttardyń qatty razy ekenine búgingi jıynda da kóz jetkizdik.
Arnaıy shaqyrýdy jerde qaldyrmaǵan aýdan ardagerleriniń kóbisi kókirekterine orden-medaldaryn qadap, aldyńǵy qatardan tabyldy. Bul da – jańa ashylǵan ortalyqqa degen senimniń kórinisi.
Rashhan Sydaıqyzy – qazaqtyń óz emin ózine shekpen jaýyp qaıtaryp júrgen qyz
Jazbany oqyp otyryp, "e, búgin ashylyp, erteń jabylatyn kóp klınıkanyń biri ǵoı" dep oılap qalýyńyz da ǵajap emes. Olaı oılasańyz, ári qaraı oqyńyz.
Rashhan Sydaıqyzy – Qytaıda týyp, sol jaqta oqý bitirip, jumys jasaǵan azamatsha. Tegi de, bitim-bolmysy da, qany men jany da qazaq. Bólim meńgerýshisi qyzmetine deıin kóterilip tursa da, Qytaıdaǵy mansabyn, tabysyn qurban etip, atamekenge oralady.
Sondaǵy maqsaty – qolymnan kelgen emim, jıǵan bilimimniń shapaǵaty qazaqqa, qandas baýyrǵa tısin degen oı. Ol hımıalyq medısınanyń adam aǵzasyna ýaqytsha tynyshtyq bergenimen kóp jaǵdaıda ózge múshelerdi búldiretinin biledi. Sol úshin qazaqtyń saıyn dalasyndaǵy túrli shópterdi paıdalanyp, emdeý mashyǵyn arttyra túsken.
Qazirgi ýaqytta qan qysymynyń joǵarylaýy, óli qan, asqorytý múshelerindegi dertter, júıke júıesiniń jáne búırek, zár shyǵarý joldarynyń syr berýi jasaryp ári kóbeıip ketken. Osy dertterdiń báriniń emi bar ásilinde. Shóppen emdeý, tuzben, balshyqpen, qummen emdeý baǵytyndaǵy dúnıelerdi Rashhan hanym handyq dáýirde jazylǵan Óteıboıdaq Tileýqabylulynyń "Shıpagerlik baıan" atty kitabynan bastap, búgingi damyǵan tehnologıasyna deıin oqyp, zerttep keledi.
"Rashmed" úsheý boldy
Osyndaı uly maqsat ony elge alyp keldi. Elge kelgen Rashhan hanym bárin basynan bastaýǵa májbúr edi.
Onyń Nur-Sultan qalasynda, Óskemen qalasynda ashqan ortalyqtary jurtshylyqtyń jappaı yqylasyna bólenip, beli aýyryp, baltyry syzdaǵan azamattardyń barlyǵyna unady. Sol yqylas pen alǵys Rashhan hanymǵa Almaty qalasynan bólimshe ashýǵa túrtki boldy.
Oıda júrgen izgi maqsattyń oryndalýyn Jaratqan búgingi kúnge buıyrtqan eken.
Jıynda bolyp, tilek aıtqan, lebiz bildirgen, bata bergen qarttardyń barlyǵy óz razylyqtaryn tanytyp, tórt qabattan turatyn medısınalyq ortalyqtyń aldaǵy jumysyna sáttilik tilep tarqasty.
Endi Alataý aýdanynyń kórki odan ári arta túspek. Dene shynyqtyrǵyńyz kelse – "Almaty Arena" sport keshenine, rýhanıatyńyzdy baıytqyńyz kelse – "Alataý" dástúrli óner teatryna, túshkirip, tumaý tıse – "Rashmed" medısınalyq ortalyǵyna tartasyz.
"Aýrý batpandap kirip, mysqaldap shyǵady" deıdi dana halyq. Jylyna bir ret medısınalyq ortalyqqa baryp, "motoryńyzdyń" kúshin teksertip tursańyz, artyq etpeıdi.
Oqı otyryńyz:
♦Rashhan Sydaıqyzy: Oryssha bilmegendikten Prezıdent emhanasynda jumys isteýden bas tarttym
