Qazaqstannyń bilim jáne ǵylym mınıstrligi jemqorlyqpen kúres strategıasyn qaıta qarastyryp jatyr. Bul týraly vedomstvonyń jańa basshysy Asqat Aımaǵambetov aıtty dep habarlaıdy Qamshy.kz aqparat agenttigi Sputnik Qazaqstan tilshisine silteme jasap.
Aımaǵambetov jemqorlyqqa qarsy kúres mınıstrlik jumysynyń basym baǵyttarynyń biri ekenin atap ótti.
"Biz qazir jobalyq keńse ashýdy josparlap otyrmyz. Onda jemqorlyqty joıý baǵytynda naqty sharalar qabyldanady. Buǵan qosa, barlyq quqyqtyq aktige, rettelmegen máselelerge taldaý júrgizemiz", - dedi ol úkimet úıinde ótken baspasóz máslıhatynda.
Sonymen qatar, mınıstrdiń aıtýynsha, monıtorıń jasaıtyn arnaıy toptar qurylady. Onyń quramyna BAQ, úkimettik emes uıymdar men jurtshylyq ókilderi kirmek.
"Men jańa mınıstr retinde munyń mańyzdy másele ekenin túsinemin. Buǵan qosa, biz qazir jemqorlyqpen kúres strategıasyn qaıta qarastyryp jatyrmyz. Mańyzdysy ustap alǵannan keıingisi emes. Másele normatıvtik quqyqtyq kemshilikterde bolyp tur. Bul kemshilikter kóp jaǵdaıda sybaılas jemqorlyq qylmysyna sebep bolyp jatady", - dep túsindirdi Aımaǵambetov.
Pikir qaldyrý