2020 jyly pandemıaǵa baılanysty keı kásiporyndar qashyqtan jumys isteý kóship, qashyqtan jumys isteı almaıtyn kompanıalar qyzmetin tolyǵymen toqtatqan. Bul sharalar álemdik ekonomıkanyń ósý qarqynyna teris áser etip, kóptegen kompanıalardyń qyzmetin júrgizýde qıyndyqtar týdy. 

Qazaqstanda shaǵyn jáne orta bıznesti qoldaý úshin salyqtyq yntalandyrý, arzandatylǵan kredıtter men olardyń merzimin uzartý, ákimshilik júktemeni azaıtý, bıznes-ahýaldy jaqsartý, bıznes máselelerin jedel sheshý sekildi birqatar sharalar engizildi. 700 myńnan astam kásipkerlik sýbektini qamtyǵan bul sharalar JİÓ-niń 1%-1,3% mólsherindegi salyq túsimderinen aırylýyna ákelip soqty.

Ótken jyly memlekettik búdjet 8,6 trln teńgege tolyqty. 2019 jylmen salystyrǵanda onyń kólemi 655,3 mlrd teńgege kem.

Bul rette salyqtardyń 46%-yn qalyptastyratyn elý iri salyq tóleýshiden 3,9 trln teńge tólendi, bul 2019 jylǵa qaraǵanda 32,3%-ǵa az.

2020 jyly búdjet túsiminiń negizgi somasyn dástúrli túrde munaı jáne ilespe gaz óndirýmen aınalysatyn kásiporyndar quraǵan. Olardyń úlesine elý iri salyq tóleýshilerdiń barlyq tólemderiniń 59%-y nemese 2,3 trln teńge tıesili. Ótken kezeńmen salystyrǵanda osy kompanıalar tólegen salyq kólemi rekordtyq 46,6%-ǵa tómendedi.

Reıtıńte munaı salasyndaǵy kompanıalardan keıin jaıǵasqan metalýrgıa salasynyń salyq túsimderi jalpy túsimniń 12,5 paıyzyn nemese 493,3 mlrd teńge quraıdy. 

Reıtıńte munan soń temeki salasy jaıǵasqan. Oǵan úsh iri kompanıa engen. Olar 271,5 mlrd teńge salyq tóledi.

Taý-ken óndirý ónerkásibi jáne karerlerdi qazý kompanıalary salyq tólemderi boıynsha eń iri tórt salanyń qataryna engen. Olardyń búdjeti 200,9 mlrd teńgeni quraǵan.

Reıtıńke sondaı-aq munaı óńdeý salasynyń, telekomýnıkasıa, bank sektory, logıstıka, spırttik ishimdikter óndirisi, ınjenerıa ókilderi kirgen.