Ár qazaq patrıot, ár qazaq baýyrmal, ár qazaq ultshyl. Biraq, shynaıy iske kelgende kóbimizdiń qolymyzdan kelip jatqany shamaly. «Aǵaıyn tatý bolsa, at kóp»,- degendeı aǵaıynshyldyqtyń, baýyrmaldyqtyń, janashyrlyqtyń, adamshylyqtyń úlgisin Isataı Symaǵul atty azamat kórsetti. Úsh qazaqtyń bireýi shette, tipti arasynda bosqyn qazaqtyń baryn eskersek, Istaıdyń jasaǵan erligin qolynan kelgen qarapaıym ár qazaq jasaı alady. Ol sonshalyqty qıyn da sharýa emes.
Esterińizde bolsa, osy aptanyń basynda «Qamshy» portalynda «Bosqyndar arasynda qazaqtar da bar. Azattyǵy bar el qandastaryn oqqa tosyp otyra bere me?»,- degen atpen maqala jaryq kórdi (http://qamshy.kz/home/show/1503). Aýǵanystannan qonys aýdaryp, Iranǵa baryp bosqyn bolǵan, óz aty jónin Jánibek Násiruly dep tanystyrǵan azamattyń qalaı bosqyn bolǵanynan bastap, bosqyndyq ómirin tanystyra kelip, azat qazaq eliniń azamaty bolǵysy keletin nıetin jazǵan edi. Óz azat Otany bar azamattyń bosqyn bolyp júrgeni sol ulttyń barsha azamatynyń súıegine tańba ekeni anyq. Áleýmettik jeli men saıt oqyrmandary Jánibekke degen janashyrlyqtaryn bildirip jatty. Barsha aǵaıynnyń baýyryna degen izgi alańdaýshylyq pikirleriniń ishinde erekshe kózge túskeni- Isataı Smaǵul degen qoldanýshynyń pikiri boldy. Saıttaǵy maqalanyń astyna «Assalaýmaǵaleıkóm baýyrym, on sotyq jerim bar kolymnan keletini sol. Mende bılik deıtin- bılik jok. Qolymnan keleri osy kelem deseń, habarlas: 87022339085, Aqtóbe obl. Alǵa aýd. Eset batyr aýyly.», - dep pikirin qaldyryp, artynan meniń feızbýktaǵy paraqshama «Turdybek, mende bılik jok kolymda. Biraq úıimniń kasynda on sotyq jerim bar. Kelem deseń tegin berem dep jazǵam pikirine tel qaldyrdym. Dál sol jerge álim keledi, salyp jatkan úıim jok, Bosqa tur. Qolymnan kelgeni sol. Aıaqqa turyp keter dokýment jaǵynan kómekteseıikshi odanda? Osy fb-da aýzymen oraq oratyndar kóp qoı, osyndaıda aıtarǵa sóz tappaı kalady! Meniń de ońyp týrǵanym shamaly, biraq basymda táýelsizdigim bar. Qoınymda Otanym bar. Turyp jatqan baspanam bar kelsin, baýyr bolyp ketermiz.»,- dep óziniń azamatqa saı márttik oıyn bildiripti. Men de Isataıǵa habarlasyp, Jánibekke bul sálemin jetkizetinimdi aıtqanmyn. Aldaǵy ýaqytta Isataı Jánibekke óz syılyǵyn tabystaýynyń kýási bola jatarmyz.
Isataı sózinde óziniń shalqyp tasyp otyrmaǵanyn, qolyndaǵy bary sol ekenin aıtyp, «astyndaǵy jalǵyz atyn soıyp berýge» daıyn ekenin bildirgen. Baýyrymyzdyń bul adamgershiligine kimniń de bolsyn júregi eljiremeı turmas. « Bar baılyǵym –táýelsizdik, Otanymnyń azamattyǵy»,- degen Isataıdan ár qazaq úırense deımiz. İshtegi bolsyn, syrttaǵy bolsyn bir qazaqqa ekinshi bireýimiz osylaı qolymyzdan kelgen kómegimizdi aıamasaq, erteń bir de bir qazaq dalada qalmasy anyq! Júregimizdi syzdatqan onyń dármensiz jaǵdaıyna qol ushyn bergimiz-aq keledi. Isataıdan basqa da oqyrmandar kómek berýge umtylyp otyr. Biraq Jánibektiń jalǵyz-aq armany bar. Ol qazaq eliniń azamattyǵyn alý. Qazir onyń bosqyn degen qujaty ǵana bar. Al qujat máselesin qarapaıym qazaq emes, yqpaldy azamattar ǵana sheshe alady. Onsyz da az ǵana qazaqtyń bir tobyn qazaqtyqtan shyǵaryp tastamaý kerek dep esepteımin.
Turdybek Qurmethan
