1-qazannan beri kún saıyn elimizdiń bas qalasy – Astanada «Báıterek» monýmenti, «Tulpar» kópiri, Almatyda Balýan Sholaq atyndaǵy sport saraıy keshke qaraı jaryq arqyly kúlgin túske aınalǵany baıqalǵan. Bul týraly «Qamshy» portaly habarlaıdy. Elimizdegi qyz-kelinshekterdiń qurmetine arnyp, ádeıi solaı jaryqtandyrý tásili júzege asyp jatyr eken.

 Osylaısha otandyq mammolog mamandar áıelder men qyzdardyń nazaryn qaterli isikpen kúresýge, onyń aldyn alýǵa, der kezinde emdelýge shaqyrýdy maqsat etedi. Sebebi, qazan aıy – Sút bezi qaterli isigimen búkilálemdik kúres aıy.

Uıymdastyrýshylar «kúlgin tús – náziktikke shaqyrady, ómir súrýge qushtarlyqty arttyrady» deıdi. Sondyqtan, elimizdiń negizgi qalalarynda ótip jatqan bul shara arqyly búkil áıel qaýymyna «densaýlyq – birinshi baılyq» ekenin taǵy bir ret eske salýdy jón kórgen. Mundaı aýqymdy shara Reseı men Ýkraına elderinde de ótkizilmek.

Buǵan qosa, omyraý obyrymen kúres aıy aıasynda Qazaq onkologıa jáne radıologıa ǵylymı-zertteý ınstıtýty men «Qazaqstannyń onkologtar men radıologtar qoǵamy» qoǵamdyq birlestigi «Sút bezi qaterli isiginiń júıeli terapıasy» atty halyqaralyq ǵylymı-praktıkalyq konferensıa ótkizedi. Bul bas qosýǵa QR Densaýlyq saqtaý jáne áleýmettik damý mınıstrliginiń turǵyndarǵa onkologıalyq kómek kórsetý Departamenti muryndyq boldy.

DDSU-nyń málimetinshe, jyl saıyn mıllıonnan asa áıel osy dertpen aýyrady. Oǵan qosa, mamandar bul aýrýdyń jyldan-jylǵa «jasaryp» kele jatqanyn aıtady. Al, Qazaqstanda omyraý qaterli isigi onkoaýrýlar arasynda birinshi orynda, al ólim-jitim kórsetkishi boıynsha úshinshi orynda tur.