Erteń  óleńsúıer qaýymnyń erekshe yqylasyna bólengen, lırık aqyn Tumanbaı Moldaǵalıevtiń dúnıeden ozǵan kúni. Qazaqtyń sóz patshalyǵyna móldir jyrlarymen qaltqysyz eńbek sińirgen aqynnyń óleńderin súıegine sóz qonǵan keleshek oqyrmandar da  erekshe yqylaspen qabyldaıtyn bolady. Tumanbaı Moldaǵalıevtiń túńǵysh óleńi "Ýkraına qyzyna"  degen atpen  1954 jyly jarıalanǵan. Sóz sabazyna degen taǵzymmen onyń «Ýkraına» dep atalatyn óleńin jarıalaǵandy qup kórdik.

Shalqar kóldi, kók ózendi,
Sen qandyrdyń kenezemdi, Ýkraına.
Birge batty Dneprge batyr qazaq,
Túnde qaqty terezeńdi, Ýkraına.

Qyzyńa da ǵashyq boldym,
Bir kórýge asyq boldym, Ýkraına.
Bir ókinbeı ótken kúndi kórgenim joq,
Dneprdeı tasyp toldym, Ýkraına.

Ánińmenen ánim týys,
Qanyńmenen qanym týys, Ýkraına.
Meniń eńsem bıikteıdi seni kórsem,
Jaqyn kelseń janym tynysh, Ýkraına.

Kıevińdi kıem deımin,
Bir sypaıy kúıeýdeımin, Ýkraına.
Qonaq bolyp bolyp kele qalsań Almatyǵa,
Kópke deıin jibermeımin, Ýkraına.

Tarasyńa talasym bar,
Sende jıen, naǵashym bar, Ýkraına.
Qazaq jerin jatsynbaıdy júrekteriń,
Qazaq deseń qalasyńdar,Ýkraına.

Kóńilińnen qaıaý ketsin,
Jigit elge oıaý jetsin, Ýkraına.
Bir qyzyńdy mingestirip jiberer em.
Atqa minbeı jaıaý kepsiń, Ýkraına.

Máńgi maǵan dos aǵam bol,
Tórim de bol, bosaǵam bol, Ýkraına.
Bóliskenshe bólisermiz baq pen bardy
Kóriskenshe qosh aman bol, Ýkraına.

At mingizip jibermedim
Renjime, Ýkraına.
Haı jıve, Ýkraına
Haı jıve, Ýkraına!

Tumanbaı Moldaǵalıev