Májilis depýtattary “Mádenıet jáne bilim berý máseleleri boıynsha zańnamalyq ózgerister engizý týraly” zań jobasyn birinshi oqylymda maquldady.

Bul qujattyń mańyzdy tustarynyń biri – 10-11 synyp oqýshylaryna mektep baǵdarlamasymen qatar, qosymsha kásiptik daǵdylardy meńgerýge múmkindik beriledi.

Eger mektep ornalasqan jerde mundaı múmkindik bolsa, oqýshylar óz erkimen qosymsha kásipti ıgere alady. Bul ásirese aýdan ortalyqtarynda yńǵaıly.

Oqýshylar tańerteń mektepke baryp, tústen keıin sol jerdegi kolejde santehnık, aspaz sıaqty mamandyqtardy oqı alady. Olar qysqartylǵan baǵdarlama boıynsha tek profıldi pánderdi meńgerip, arnaıy grantpen bilim alady. Osylaısha, mektepti bitirgende qolynda qosymsha mamandyǵy bar túlek eńbek naryǵyna daıyn bolyp shyǵady, – deıdi Májilis depýtaty Asqat Aımaǵambetov.

Ol bul jobanyń jas túlekterge úlken múmkindik beretinin aıtady.

Oqý-aǵartý mınıstrligi 2022 jyldan bastap osyndaı pılottyq jobany júzege asyryp keledi. Qazir bul baǵdarlama eldiń 17 óńirindegi 100-den astam mektep pen 40-tan astam kolejde iske asýda. Oqý 16 túrli mamandyq boıynsha júrgizilip, alǵashqy nátıjeleri de bar. Bıyldyń ózinde 700-den astam túlek kásiptik biliktilik alyp, jumysqa ornalasýǵa múmkindik almaq.

Eske sala keteıik, osyǵan deıin kitaphanalarǵa tabys tabý quqyǵy beriletini týraly jazdyq. Daryndy balalarǵa bir rettik syıaqy beriletini týraly da aıtyldy.