Qazaqstanda Iandeks.Taksıdiń baǵa qalyptastyrý júıesine qatysty tekseristen keıin, kompanıaǵa tarıfterdi negizsiz ósirýge tyıym salyndy. Aýdıtti Básekelestikti qorǵaý jáne damytý agenttigi men Sıfrlyq damý, ınovasıalar jáne aeroǵarysh ónerkásibi mınıstrligi birlesip júrgizgen.

Mınıstrliktiń habarlaýynsha, baǵa algorıtminde tutynýshylarǵa teris áser etýi múmkin birqatar táýekel anyqtalǵan. Olardyń bir bóligi joıylsa, qalǵany boıynsha Iandeks mindettemeler aldy.

Kompanıa engizýge kelisken negizgi ózgerister:

Tarıfter men bazalyq qundy kóterer aldynda 3 kún buryn eskertý;

Áýejaı tarıftik aımaǵynan keıbir turǵyn aýdandardy shyǵarý;

Júrgizýshilerdiń tabysyn azaıtpaý úshin jol qunynyń eki esesinen artyq komısıa ustamaý;

«Ekonom» tarıfindegi komısıany eki jylda bir retten jıi kótermeý;

Maksımaldy suranys kezinde tarıfti 3 eseden artyq ósirmeý (bul shekteý ár toqsandaǵy saparlardyń 5%-ynan aspaýy tıis);

Sapar baǵasynyń tolyq qurylymyn 2025 jyldyń 30 maýsymyna deıin qosymshada ashyq kórsetý;

Tehqoldaýdyń tıimdiligin arttyrý.

Sonymen qatar, suranys shekten tys artqan sátterde «Ekonom» tarıfine vırtýaldy kezek júıesi engiziledi. Bul arqyly paıdalanýshylar taksı surap turǵan adamdardyń sanyn kórip, ne kútý, ne basqa tarıfti tańdaý, ne qoǵamdyq kólikke otyrý sheshimin ózderi qabyldaı alady.

Iandeks budan bylaı jeńildikter baǵdarlamasynyń shyǵyndaryn tolyq ózi óteıdi. Bul ózgerister paıdalanýshylardyń quqyqtaryn qorǵap, ádil naryq qalyptastyrýǵa baǵyttalǵan.