Besterekte bolǵan jol apatynan zardap shekken eki balanyń jaǵdaıyn dárigerler «qanaǵattanarlyqqa jaqyn» dep baǵalap otyr.  Olar búgin aýrýhanadan shyǵarylady. Bul týraly Astana qalasynyń densaýlyq saqtaý basqarmasynyń ókilderi habarlady.

"Eki balaǵa da ota sátti jasaldy. Qazirgi jaǵdaılary jaqsy, jaqyn kúnderi aýrýhanadan shyǵarylady", delingen jaýapta. 

Al aýyr halde bolǵandyqtan Astanaǵa jetkizilmeı, aldymen Úrjar aýdandyq aýrýhanasynda baqylaýda bolǵan, keıin 23 tamyzda sanavıasıamen Semeıge jetkizilgen qyz balanyń jaǵdaıy áli de óte aýyr. Ol komada jatyr. Dárigerler barlyq qajetti em sharalaryn jasap jatqanyn atap ótti.

Eske sala ketsek, 19 tamyz kúni Besterek aýylynda Toyota kóliginiń júrgizýshisi jol jıeginde turǵan balalardy qaǵyp ketken edi. Oqıǵa úı qaqpasynyń aldynda, joldan nebári 10 metr jerde bolǵan.

Saldarynan eki bala oqıǵa ornynda qaza tapty, taǵy biri aýrýhanaǵa barar jolda kóz jumdy. Taǵy úsh bala túrli jaraqattarmen aýrýhanaǵa jetkizildi. Qaıtys bolǵan balalardyń jasy 2 men 7 jas aralyǵynda bolsa, jaraqat alǵandardyń jasy 6-dan 9 jasqa deıingi aralyqta.