Kettim aqyr qosh endi ósken qala, Saǵan qaraı júgirmen ókpemdi ala. Eshteńe de almaımyn endi senen, Qalǵany este umtylmas sátter ǵana... Kerýen- bazar júk artqan túıesine, Satýshynyń jyǵylmaı júıesine. Júrek seniń tabam dep qalaýyńdy, Qansha zatty qaıtardym ıesine... Bolmas taǵdyr jazbasa janyńa qut, Buıyrmas jan kelmeıdi saryla kút. Men qaıtarǵan zattardy basqa jandar, Kezekpenen áketti qaǵyp alyp.... Qalaǵanym qolyma ilinbedi, Basqa jannyń qasynda kúlimdedi. Kún batysty betke alyp júrip kettim, Kerýenge ilesip ińirdegi.... Shıelerdiń gúlderi esimdi alyp, Baq ishine toqtady kóshim baryp. Júregim joq keýdemde deısiń maǵan, Álemime alańsyz tosyn baryp. "Máni bolmaı ómirdiń sen ketkeli, Bir saǵynysh janymdy sheńbektedi. Júregimdi ketkensiń urlap alyp, Óz qolyńmen ber deısiń emdep meni" Bolmap edim men qarsy talǵamyńa, Jetti ǵoı dep júrýshi em armanyna. Sen degende bulqynad mynaý júrek, Mende ketip shynymen qalǵany ma? Túse berdiń nesine jıi esime, Sol sezimniń bas urǵam kıesine. Kókiregimnen aılanyp shyqpaı qoıdy, Qaıtaraıyn dep edim ıesine... Endi qaıt deısiń maǵan?!!

Kóshesi alyppen atalatuǵyn, Baqtary gúlmen jasanatuǵyn. Qyrany kókke kóterilerde, Alataý qarttan bata alatuǵyn. Júzimdi jelge súıdirmeıin dep, Tánimdi kúnge kúıdirmeıin dep. Áınekterimdi japyraq japqan, Qabattap lypa kıdirmeıin dep. Qyzdary sulý kózi jaınaǵan, Ǵashyq bolmasqa seni qoımaǵan. Bireýdiń janyp baqyt juldyzy, Bireýdiń qańǵyp sory qaınaǵan. Qarbalas tirlik sanada kúman, Birese jańbyr birese tuman. Jaǵasy jaılaý etegi shahar, Almaty deıtin qalada turam. Jyr jazyp taýsam sıanyń bárin, Qaǵazǵa oıdyń jıamyn nárin. Bir azamattyń alaqanyndamyn, Biraz jigittiń qıalyndamyn....

Keshir ýaqyt ótkeniń qaramaı, Qaıyrylmaı ketkenińe qaramaı. Men ony áli balaıdy ekem ózime, Dástúrlerdiń shekteýine qaramaı. Ekeýmizde bolǵan emes kelisim, Qur súlderim kezip keled el ishin. Sol bir jandy jolyqtyrǵan mezette, Toqtap qalǵan sıaqtysyń men úshin. Júregimde sezim salǵan iz qaldy, Saǵynysh bop saraıymda kúz qaldy. Aı kúzetken terezemdi tún qaldy, Bir aq kúnde muńǵa oranǵan qyz qaldy. Sonan beri elesi onyń bıledi, Kóz janary júregimdi túıredi. Ýaqyttyń toqtaýyna ilesip, Burymym da óspeı qaldy sıredi... Nege ǵana sol eleske eremin, Qaıyrylmasyn sezsem daǵy kemeniń. Sol bir jan kep tartqanynsha óolymnan, Keshir ýaqyt seniń de joq keregiń.....

Mazasyz oılar sen kelseń sap tynady eken, Qasyma meniń kidirip baq turady eken. Áýre bolyp nesine keldiń degenmen, Kóńilim seni kórgendi jaqtyrady eken. Qarbalaspyn dep syltaýdy mańaılaıdy ekem, Bir júrgen kúndi eske alyp san oılaıdy ekem. Kelmeıtinińdi ishimnen sezip tursam da, Sen jaqtan kelgen kólikke qaraılaıdy ekem... Sen úshin qıyn belesten asa alady ekem, Sonda da bárin jasyryp qasarady ekem. Ońasha qalǵyń kelgenin bilip tursam da, Toptasqan jannyń ishine aparady ekem. ...Kórmese kúndi gúl muńǵa tunshyǵady eken, Tunshyǵady eken, tunshyqqan gúl synady eken. Shydamym bitti qyrsyǵa qoımaspyn deýshi em, Qyrsyǵady ekem bári bir, qyrsyǵady ekem... .JAŃBYR KESHTİM Sol bir ottyń sen de kórdiń aptabyn, Janǵan otty jan saraıǵa saqtadyń, Nege maǵan kináni úıip tókpediń, Nege sennen tarydaı min tappadym? Jańbyr keshtim. Shyǵa almadyń shatyr ap, Seni kúttim jan sekildi em aqymaq. Kúzgi baqtyń jurt jınady jemisin, Ekeýmizge buıyrǵany japyraq. Selt etkizbeı iship- jegen kózder túk, (Olarǵa da aıtyldy san sózder tik) Nazaryńdy sen burǵanda basqaǵa, Áýenimdi men de aıttym ózgertip. Basqa taýdyń unatqanda balasyn, Basqa jaqqa qaǵylǵanda qanatym. Sezip turyp, sezbgendeı til qatyp, Estip turyp estimegen bolasyń. Qoshtasyp em. Bilsem dediń sebebin, Mende qalyp qoıad dedim nege muń. Onsyz daǵy jyraqta ediń nege olaı, Aıtqanymdy túsine almaı kelemin. Óziń jaqqa bastamaıdy jol kileń, Amalsyzdan kókjıekke telmirem. Sol sezimdi sýytar sóz estýge, Ne istesem bolar eken endi men!!

Nesine janbas kezde órtenemin, Beınetpen aq qaǵazǵa ter tógemin. Sen úshin ǵumyr keshtim qaq bólinip, Basyma shyǵyp ketken erke óleńim. Arbalyp magnıtteı jyr kúshine, Syr ashpaı sennen basqa bir kisige. Men qyzyqtym uıqastyń órnegine, Qyz qyzyqsa kıimniń úlgisine. Qalmaı qoıǵan qasymnan janasalap, Ala almadyń jel sózden arashalap. Óziń bılep erkimdi alǵan kezde, Júrdi ózgeler syrtymnan tamashalap. Qosylmaı áýenine saýyq, toıdyń, Qasynda muńy bardyń qalyp qoıdym. Sen maǵan bir sezimdi jyrlattyryp, Jalǵastyra bergende.... Jaýyp qoıdyń. Basqaǵa, sirá sendeı qanyqpaspyn, Senimen birge eseıdim, qalyptastym. Sen meni bir armanǵa talpyndyryp, Jetemin deı bergende..... Alyp qashtyń! Degen em baqytymnan keshikpespin, Saǵynysh jaılaýyna kóship kettiń. Jandardyń meni kútken arasynda, Qalsam dep em... Taǵy da ótip kettiń. Jolyqqanda ózińmen móldir edim, Odan beter jyr jazyp móldiredim. Sezimi tym sekemshil adam túgil, Aǵashqa da, qusqa da.... Eljiredim. Kórdim birge senimen jel ókpegin, Túsip alyp aldyńa dedektedim. Moınyma alǵash erkelep asylǵanda, Qaıtaryp jiberýim kerek pe edi? Erke óleń!! ............................................ Keıde ómirdi shekerden de tátti ettiń, Keıde muńdy jastandyrdyń, jas tóktim. Keıde oıdyń shúńetine batyryp, Keıde appaq bult ústine ap kettiń. Kiná syndy túımedeı syr jasyrsam, Saǵan aıttym qýansam da ah ursam. Sóz patshasy qadirińe jete almaı, Keshire gór ońdy- soldy sapyrsam!!

Ózińe tán gúl edim qyrda kúlgen, Tulpar minip jan bolsań myrza júrgen. Qos daýyspen shyrqaıyq aspandatyp, Men bir ánniń sózi edim, yrǵaǵym eń. Qýanyshtan bórkińdi aspanǵa atyp, Qaıyrmasyn shyrqaı tús aspandatyp. Óziń joqta sol ándi jalǵyz aıtyp, Saǵynyshtan otyram jas parlatyp. Kúıdi keýdem qoıǵandaı jalyn jutyp, Túsine almas ózgeler qalimdi túk, Osy ándi ekeýmiz shyrqaǵandaı, Aıta almaıdy basqa eshkim tamyljytyp. Sol baıaǵy óz sertim, óz reńim, Taýsylmaıtyn sen úshin tózim edim. Syńǵyrlaǵan sup-sulý sezim ediń, Ne bolaryn bilmeımin keziger kún......

Erteme kesh bir aıtar arman ánimsiń, Úmitimdi úzilgen jalǵaǵanymsyń. Kóktem syılar kóńilge shattyq kúlkimsiń, Jıi tartqan sen meniń oń qabaǵymsyń, Janym! Kóńilińdi qatty aıtyp qaıtarmaǵanmyn, Soqsa daǵy san daýyl shaıqalmaǵanmyn. Búldirgenshe aǵatyn eljirep turyp, Qandaı jaqsy oıymnyń aıta almaǵanym, Bárin.... Japyraqtar janyma diril qosady, Esimińdi eske alsam muńym qashady. Kúreńitip seni oılap kúnim batady, Jaqsy túske elitip kúlip atady, Tańym. Keskinińe qaraımyn oılanyp qalǵan, Meniń qymbat múlkime aılanyp bolǵan. Ketem desem qolymdy jibere salma, Bir sezimge júregim baılanyp qalǵan, Barym. Osy eken júrektiń arqandalǵany, Bir elestiń janyma qalqan bolǵany. Kezdespeseń kezdespe qıyn sát qoı ol, Sezimimniń ishinde qalsam bolǵany. Jalyn!! ................................................. Qala berdiń jan saraıyn mekendep, Áýrelendim bosqa umytyp ketem dep, Kórgende alǵash kúıip ketti júregim, Erte nege jolyqpadyń eken dep! Saǵan qaraı buryldym da, qaıran qap, Qaıta meni tapqandaı ed taıǵan baq. Az kidirmeı qalyp qoıdyń nesine, Kete bermeı baǵytyńmen saırandap. Kókten emes jerden sáýle shashyldy, Keýdemde bir tolqyn týbasyldy. Qatarlasyp birge nesin júrdiń sen, Bir qamshylap ótip ketpeı atyńdy? Ótip ketshi! Tulparyńdy qamshylap. Ór tulǵańdy tobyrlardan arshyp ap, Kózińdegi kórmeı qalsam muńdy men, Qala bersem monshaqtarym tamshylap.....

Tún- shymyldyqtyń ishinde bizder tildestik Juldyzdar anaý túskıgizdegi monshaqtar. Jaqyn ǵyp bitti janymyzdaǵy úndestik Tumar ǵyp aıdy aıtatyn syryń bolsa aqtar. Ǵaryshtan kelgen sharpydy jylý denemdi, Zymyrap óter shaqtarym mynaý keńesken. Senesiń túnge, joldaısyń ystyq sálemdi, Jartysy jolda shashylyp qalar demesten. Shýlaǵan sózder. suqtanǵan kózder, joq bári, Dem ala tursyn bizder úshin de sol tynysh. Alystaǵy taý jyljyp kelgendeı qasyńa. Tek sen bolǵan soń bılemes meni qorqynysh. Jaltarǵym kelip jalt berip kórdim qansha ret, Kesh bolsa daǵy sezimniń syryn uǵyndyq. Kútedi bizdi syrlasyp taǵy qalsa dep, Úkili úmit taǵynǵan alyp shymyldyq....