ن. نازاربايەۆ: ورىسشا حاتقا قازاقشا جاۋاپ بەرگەندەر جۇمىستان قۋىلسىن!
دەمەڭىز بۇنى ايتۋعا قىساعان كىم؟
كوڭىلدى كىربەڭ باستى، قۇسادان مۇڭ.
ءتىل جايلى ايتقانىڭىز اۋىر ءتيدى،
وسىعان اشيدى ەكەن ءىشى ادامنىڭ.
حالىقتىڭ ءتىلىن ساقتاپ قالۋ ءۇشىن،
حاندارىم بارىن قىلعان ءىس-امالدىڭ.
ءدىنىمىزدىڭ دىڭگەگى بوساماي ما،
ءتىلىمىز تىركەسىنەن جۇتاعان كۇن.
دات، تاقسىر، وسى جايلى ايتارىم بار،
اقىن ەم، ايبىنىڭنان كۇش الارمىن.
ابىلايشا اقىلمەن شەشەر دەيمىز،
بۇقارشا بۋرىقانعان بۇقاراڭمىن.
قاسيەت سەزىنگەسىن كيەلى ۇننەن،
قاراعا حان قۇلاعىن تۇرە بىلگەن.
حالىقتان ءقادىر قاشار ءتىل جويىلسا،
بالىقتان ايىرمام نە بۇل ومىردەن.
ءبىر ءوزىم باس پايدا ءۇشىن جۇرگەمىن جوق،
تىلەدىم جۇرتىم دەيتىن جۇرەگىممەن.
جاناشىر تابىلماسا قازاق قايتەر،
انا ءتىل ايىرىلسا تىرەگىمنەن.
ءبىر كۇنى توبەمىزدە ويناماي ما،
ورىس ءتىلى ەسىگىمنەن كۇلە كىرگەن.
بولعاسىن بويىمداعى قازاق قانى،
اتا ءدىن، انا ءتىلدى سۇيە بىلگەم.
ءۇيسىز بولسام ۇيشىكتە كۇن كەشەرمىن،
ءتىلسىز قالاي ءومىردى سۇرەمىن مەن؟!
ءار قازاق انا ءتىلىن ارداقتاسىن،
اقىرىن جاساپ الار ال باسقاسىن.
سانداعان زۇلماتتاردان امان كەلدىك،
تامىرلى ءتىل ۇزىلمەي جالعاسقاسىن.
سوڭىنان ەل ەرەدى ۇمىتپەنەن،
جولىنان اداسپاعان حان باستاسىن.
دارگەيىڭدەگى ەلدىڭ داتى وسىلاي،
ارحيۆىن تاريحتىڭ شاڭ باسپاسىن.
زيالىلار قورعاعان قازاق ءتىلىن،
قاسىرەت قازانىندا قايناتپاسىن.
ءتىل جايلى جۇرتتىڭ ويىن، ۇلتتىڭ داتىن،
ەلباسى ساناسىندا سالماقتاسىن!!!
ەرلان تولەۋباي
پىكىر قالدىرۋ