ءال-فارابي اتىنداعى قازاق ۇلتتىق ۋنيۆەرسيتەتىندە «فلاگمان» باعدارلاماسى: دەڭگەيلىك سەرتيفيكاسيا فورماتىنداعى تىلدىك دايىندىق» حالىقارالىق عىلىمي-ادىستەمەلىك كونفەرەنسياسى ءوتتى، - دەپ حابارلايدى «قامشى» پورتالى.
اقش-تىڭ مەملەكەتتىك «فلاگمان» ءبىلىم بەرۋ جوباسى ەكىنشى وقۋ جىلى قاتارىنان امەريكاندىق ستۋدەنتتەرگە ءال-فارابي اتىنداعى قازۇۋ-دا ورىس تىلىندە كۇندەلىكتى قارىم-قاتىناس ورناتۋدىڭ مۇمكىندىگىن ۇسىنىپ وتىر. فيلولوگيا جانە الەم تىلدەرى فاكۋلتەتىندە اكادەميالىق ۇتقىرلىق باعدارلاماسى بويىنشا ۆيسكونسين، كاليفورنيا، ورەگون، پەنسيلۆانيا جانە ت.ب. شتاتتاردان كەلگەن ستۋدەنتتەر ءبىلىم الۋدا.
حالىقارالىق ءبىلىم بەرۋ بويىنشا امەريكاندىق كەڭەستىڭ پرەزيدەنتى (ACCELS)، پروفەسسور دەن ديەۆيدسون: «فلاگمان» باعدارلاماسى باسشىلارىنىڭ ءال-فارابي اتىنداعى قازۇۋ-دى تاڭداۋ سەبەبى مەيلىنشە انىق: قازۇۋ-دا ورىس ءتىلى بويىنشا تەوريالىق، وقۋ جانە ادىستەمەلىك جۇمىستارى بار الەمدىك دەڭگەيدەگى عالىمداردىڭ، ورىس ءتىلىنىڭ بىلىكتى وقىتۋشىلارىنىڭ تاجىريبەلى ۇجىمى قىزمەت ەتەدى»، – دەپ پىكىر ءبىلدىردى.
ءال-فارابي اتىنداعى قازۇۋ-دىڭ ءبىرىنشى پرورەكتورى مۇحامبەتقالي بۇركىتبايەۆ «فلاگمان» ءبىلىم بەرۋ باعدارلاماسىنىڭ وتە ءساتتى جۇرگىزىلىپ جاتقاندىعىن، امەريكاندىق ستۋدەنتتەردىڭ دارىستەرگە قاتىسىپ، وقۋ توپتارىندا ءبىلىم الىپ جۇرگەندىكتەرىن، ماماندىقتارى نەمەسە قىزىعۋشىلىقتارى بويىنشا سپەسكۋرستار تىڭداپ، وندىرىستىك پراكتيكا بارىسىندا دا بەلسەندىلىك تانىتاتىندىعىن اتاپ ءوتتى.
«فلاگماندىق ستۋدەنتتەردىڭ وندىرىستىك پراكتيكالارى ءارتۇرلى مەكەمەلەر مەن ۇيىمداردا وتەدى. مەن پراكتيكا كەزىندە ورتا مەكتەپتە بولدىم: «تاريح» ءپانى بويىنشا ساباق جۇرگىزىپ، ءمۇعالىم قىزمەتىنىڭ جاۋاپكەرشىلىگىن ءتۇسىندىم. بىزگە بەرىپ جاتقان بىلىمدەرى ءۇشىن قازاق ۇلتتىق ۋنيۆەرسيتەتىنىڭ وقىتۋشىلارىنا العىس بىلدىرەمىن»، – دەيدى ماريسا يرۆين.
ءال-فارابي اتىنداعى قازۇۋ پروفەسسورى، فيلولوگيا عىلىمدارىنىڭ دوكتورى ەلەونورا سۇلەيمەنوۆا: «امەريكاندىق ستۋدەنتتەر مەكتەپتەردە ساباق ءوتىپ، مادەني شارالار وتكىزەدى، مۇراجايلاردا جۇمىس جاسايدى، ورمان شارۋاشىلىعىندا سەلەكسيونەرلەرگە كومەكتەسەدى، بيولوگيا جانە بيوتەحنولوگيا ماسەلەلەرى، ەكولوگيا ماسەلەلەرى عىلىمي-زەرتتەۋ ينستيتۋتتارىندا عىلىمي-زەرتتەۋ جۇمىستارىن ورىندايدى، «ىسكەري قازاقستان» جانە «ايقىن» گازەتتەرىنىڭ رەداكسيالارىندا قىزمەت ەتەدى»، – دەدى.
«فلاگمان» باعدارلاماسى اياسىندا امەريكاندىق ستۋدەنتتەر قازاق ءتىلى مەن مادەنيەتىن وقۋعا ەرەكشە ءمان بەرۋدە. بۇل مۇمكىندىكتىڭ تۇركى تىلدەرى مەن تۇركى مادەنيەتىنىڭ كەڭ الەمىنە جول سالاتىندىعىن فلاگماندىقتار ءجىتى تۇسىنەدى. كونفەرەنسيادا امەريكاندىق ستۋدەنتتەر «كوزىمنىڭ قاراسى» جانە «سۇلۋ قىز» اندەرىن قازاق تىلىندە ورىندادى.
ACCELSء-تىڭ اعىلشىن تىلدىلەرگە ارنالعان قازاق ءتىلى بويىنشا تانىمال وقىتۋ باعدارلاماسىنىڭ باستاماشىسى جانە دايىنداۋشىسى بولعاندىعىن ايتا كەتۋ كەرەك: «Central Asian News Broadcasts» جانە «Windows on Central Asian Culture» ون ءبىر مودۋلدىك ۆەب-كۋرستىڭ ەكى سەرياسى دايىندالدى. ۆەب-كۋرس ۇنەمى جاڭارىپ، جەتىلدىرىلىپ وتىرادى. وسى ۆەب-كۋرستىڭ ارقاسىندا قازاق ءتىلىن ۇيرەنۋگە نيەتتىلەر جيىرما جىل بويى تەگىن ءبىلىم الىپ كەلەدى.
ءال-فارابي اتىنداعى قازۇۋ ACCELSء-تىڭ شەتەلدە قازاق ءتىلىن قولداپ، قازاق ءتىلى مەن مادەنيەتىن زەرتتەۋگە قىزىعۋشىلىق تانىتقان تۇلعالاردى وقۋ ماتەريالىمەن قامتاماسىز ەتۋ بارىسىنداعى ەڭبەگىن ەرەكشە باعالايدى. قازۇۋ قازىرگى قوعامنىڭ ستۋدەنتتىك جاستارى اراسىنداعى ۇشتىلدىك ساياساتتى قولدايدى جانە ۇشتىلدىك ءبىلىم بەرۋدىڭ ءساتتى ۇلگىسىن كورسەتىپ كەلەدى.
