قازاقستاندا ازاتتىق سايتى بۇگىن دە - وسىمەن ءۇشىنشى كۇنى اشىلماي تۇر. بۇل تۋرالى ازاتتىقتىڭ سايتىندا جاريالاندى. ءقازىر وقىرماندار سايتقا google chrome براۋزەرىندەگى اينالما جولدار ارقىلى كىرۋگە ءماجبۇر.

ازاتتىق سايتى قازاقستاندا الەۋمەتتىك جەلىلەردە قازاقستاندا جەر ماسەلەسىنە قاتىستى جاپپاي بەيبىت ميتينگىگە شاقىرعان 21 مامىرعا قاراعان ءتۇنى اشىلماي قالعان.

21 مامىر كۇنى قازاقستاننىڭ بىرنەشە قالاسى - الماتى، استانا، شىمكەنت، اتىراۋ، ورال، پاۆلوداردا پوليسيا جۇزدەگەن ادامدى كوشەدەن، ۇيىنەن ۇستاپ الىپ كەتىپ، سول كۇنى كوبىن بوساتقان. الماتىدا 21 مامىردا ورتالىق رەسپۋبليكا الاڭى ماڭىندا پوليسيا جەر ماسەلەسىنە قاتىستى وي-پىكىرلەرىن بىلدىرۋگە جينالعان ونداعان ادامدى ۇستاپ اكەتكەن. ۇستالعاندار اراسىندا جۋرناليستەر، ونىڭ ىشىندە ازاتتىقتىڭ ايماقتارداعى تىلشىلەرى دە بار. قۇقىق قورعاۋشىلار مەن بەلسەندىلەر دە بار.

سونىمەن قاتار، باتىس قازاقستان وبلىسىندا جەرگىلىكتى "ۋرالسكايا نەدەليا" باسىلىمىنىڭ سايتى مەن abai.kz سايتى دا 21 مامىردان بەرى اشىلماي تۇر.