«يسلام مەملەكەتى» لاڭكەستىك ۇيىمىنىڭ سودىرلارى يراكتىڭ موسۋل قالاسىندا تىڭشىلىقپەن اينالىستى دەپ ايىپتالعان 25 ادامدى ازوت قىشقىلى تولتىرىلعان ىدىسقا سالىپ، ازاپتاپ ءولتىردى، - دەپ حابارلايدى Qamshy.kz SN-گە سىلتەمە جاساپ.

قازا تاپقانداردىڭ ءبارى ەر ازاماتتار. ولار يراك ۇكىمەتىنە جۇمىس ىستەدى دەپ ايىپتالعان. باسىلىمنىڭ حابارلاۋىنشا، لاڭكەستەر 25 ادامنىڭ بارلىعىن ءبىر جىپكە بايلاپ، قىشقىل تولى ىدىسقا بىرىنەن سوڭ ءبىرىن سالعان.

ايتا كەتەيىك، 12 مامىر كۇنى تۇركيادا جۇرگىزىلگەن رەيد بارىسىندا ەليازيگ پروۆينسياسىنان «يسلام مەملەكەتى» ۇيىمى جەتەكشىلەرىنىڭ ءبىرى ۇستالعان بولاتىن. ونىمەن بىرگە قۇقىق قورعاۋشىلار سودىرلاردىڭ باسكەسەرىن دە قولعا ءتۇسىردى. ول سيريا اۋماعىندا جاريا تۇردە ادامداردى ولتىرۋمەن اينالىسىپ كەلگەن. ۇستالعانداردان ۇيىمنىڭ قۇپيا قۇجاتتارى تاركىلەندى.

ال، 11 مامىردا «يسلام مەملەكەتى» باسشىلارى يراكتا ۇيىمنان قاشىپ شىقپاق بولعان 35 ادامدى تىرىدەي كومىپ تاستادى. 10 مامىردا سودىرلار 5 ادامنان تۇراتىن ءبىر وتباسىن تۇگەلدەي ورتەپ جىبەرگەن.

ادامدار قۇقىعىن قورعاۋمەن اينالىساتىن ۇيىمداردىڭ مالىمەتىنشە، «يسلام مەملەكەتى» لاڭكەستىك ۇيىمى بۇگىنگە دەيىن 4144 ادامدى ءولىم جازاسىنا كەسىپ، ۇكىمدى جۇزەگە اسىرعان. ولاردىڭ 2230-ى قاراپايىم تۇرعىندار، اراسىندا ايەلدەر مەن بالالار دا بار. ال، 1100 ادام — تۇتقىنعا تۇسكەن اسكەريلەر. سونداي-اق، ىشكى كيكىلجىڭ بارىسىندا ۇيىمعا مۇشە 400 سودىردىڭ دا كوزى جويىلىپتى.