ءاربىر بايانداماسى كۇلكىگە نەمەسە داۋعا ۇلاسىپ جاتاتىن مادەنيەت جانە سپورت ءمينيسترى ارىستانبەك مۇحامەدي ۇلىنىڭ كەشەگى ەسەپتىك جيىنى دا قوعامدا ءالى قىزۋ تالقىلانىپ جاتىر. بۇل جولى تەك قازاق ەمەس، كورشى قىرعىز ەلى دە قازاقستان ءمينيسترىنىڭ «ءبىرتۇرلى» اڭگىمەلەرىن ءارتۇرلى تۇسىنۋدە. تۋراسىن ايتقاندا، قىرعىزداردىڭ ا.مۇحامەديۇلىنا وكپەسى قارا قازانداي، - دەپ حابارلايدى Qamshy.kz Sn.kz سايتىنا سىلتەمە جاساپ.
وكپەلەيتىندەيى دە بار، كەشە استانادا ەسەپتىك جيىن وتكىزگەن مادەنيەت ءمينيسترى ايگىلى جازۋشى شىڭعىس ايتماتوۆتى ماقتايمىن دەپ وتىرىپ، قىرعىز حالقىنىڭ دا، ۇكىمەتىنىڭ دە شامىنا تيەتىن سوزدەر ايتتى.
«جاسىراتىنى جوق، ماسكەۋگە نەمەسە وزگە قالالارعا ۇشىپ كەلسەڭ قوعامدىق دارەتحانالاردى جاپ-جاس قىرعىزدىڭ قىزدارى جۋىپ جۇرەدى. بۇل ارينە، كوڭىلگە اۋىر تيەتىنى ءسوزسىز. ناعىز جاستىق شاعىندا نەلىكتەن ولار دارەتحانا جۋىپ ءجۇر دەپ ويلايسىڭ؟ ەلىندە جۇمىس نەمەسە بولاشاق بولماسا ارينە، قىرعىزدار وزگە قالالارعا بارىپ كۇنەلتۋگە ءماجبۇر. وسىنى ەرتەرەكتە ءبىلىپ ەسكەرتكەن شىڭعىس ايتماتوۆ — ۇلى جازۋشى»، - دەگەن بولاتىن ارىستانبەك مۇحامەدي ۇلى سول ەسەپتىك جيىندا.
ب ا ق وكىلدەرى دە ءمينيستردىڭ وسىناۋ ءسوزىن ءىلىپ اكەتىپ، جارىسا جاريالاپ جاتتى. ال، قازاقستاندىق قوعام بەلسەندىلەرى كورشى اعايىننان مۇحامەدي ۇلى ءۇشىن كەشىرىم سۇراپ، كەيبىر مادەنيەت مينيسترلەرىندە مادەنيەتتىڭ بولمايتىنىن ايتتى.
«قىرعىز باۋىرلارىمنىڭ الدىندا بۇل ءمينيستردىڭ سوزدەرى ءۇشىن كەشىرىم سۇرايمىن. قايتەسىڭ ەندى، مادەنيەتى جوق مينيسترلەر دە بولادى» دەيدى قوعام بەلسەندىسى، «بولاتحان تايجان» قورىنىڭ پرەزيدەنتى مۇحتار تايجان.
«قىرعىز باۋىرلار، ءبىزدىڭ مينيستر ءۇشىن مەنى كەشىرىڭدەر. قازاقستاندا شەنەۋنىكتەرمەن مۇنداي جايتتار ءجيى ورىن الىپ جاتادى. ولار ءجيى اقىلدارىنان دا اداسادى» دەيدى بەلسەندى ايان شارىپبايەۆ.
«قىرعىز باۋىرلارىمنان كەشىرىم سۇرايمىن مىناۋ وڭباعاننىڭ ايتقان سوزدەرى ءۇشىن» دەيدى كتك تەلەارناسىنىڭ بۇرىنعى باسشىسى ارمان شورايەۆ.
قايىرىمدىلىق شارالاردىڭ ۇنەمى باسى-قاسىندا جۇرەتىن ارۋجان ساين دە مۇحامدەي ۇلى ءۇشىن ۇيالىپ كەشىرىم سۇرايتىنىن ايتتى.
قىرعىزدار دا قازاق حالقىنا تۇسىنىستىكپەن قاراعانىمەن، ءوز ورتالارىندا قازاق ءمينيسترىنىڭ وسىناۋ سوزدەرىن ءارتۇرلى تالقىلاپ جاتىر. ءبىر تاراپ مۇنداي ادامنىڭ ۇكىمەت قۇرامىنا قالاي ەنىپ كەتكەنىنە تاڭدانسا، ەكىنشىلەرى ءوز ۇكىمەتتەرىن كىنالاۋدا.
