الماتىداعى «الما-اراسان» شاتقالىندا 9 ايلىق بالا ۇلكەن الماتى وزەنىنە قۇلاپ كەتكەن. قايعىلى وقيعا كەشە كەشكى التىلاردا بولعان، - دەپ حابارلايدى Qamshy.kz الماتى قالاسى ءىىد باسپا ءسوز قىزمەتىنە سىلتەمە جاساپ.
«9 ايلىق بالانى كوتەرگەن 15 جاستاعى اپكەسى وزەنگە سۋرەتكە ءتۇسۋ ءۇشىن جاقىن بارعان. الايدا، قىز ابايسىزدا ءسۇرىنىپ كەتىپ، نارەستەنى قۇلاتىپ العان»، - دەلىنگەن ءىىد تاراتقان حابارلامادا.
كەشە سۋعا اققان نارەستەنى ىزدەستىرۋگە توتەنشە جاعداي دەپارتامەنتى ماماندارىمەن بىرگە 48 پوليسيا قىزمەتكەرى جۇمىلدىرىلعان.
«بالا ءالى تابىلمادى. ىزدەستىرۋ جۇمىستارى جالعاسۋدا. ءقازىر ىزدەۋ جۇمىستارىنا 20 پوليسيا، 20 تج قىزمەتكەرى مەن 4 پوليسيا تەحنيكاسى جۇمىلدىرىلدى»، - دەيدى الماتى قالاسى بوستاندىق اۋدانى ءىىب باستىعى بەرىك ابىلبەكوۆ.
