سوڭعى ۋاقىتتا «ءماجىلىس جەردى جەكەگە ساتۋعا، شەتەلگە ارەنداعا بەرۋگە تىيىم سالاتىن زاڭ جوباسىن قاراۋىنا الدى» دەگەن حابار اقپارات الاڭىن شارلاپ كەتتى. بۇگىن «ءماجىلىس شەتەلگە جەردى جالعا بەرۋدى، جەكەمەنشىككە ساتۋدى توقتاتاتىن زاڭدى ماقۇلدادى» دەپ، بىرنەشە اقپارات قۇرالى (قازاق، ورىس تىلدەرىندە) ەلدەن ءسۇيىنشى سۇراپ جاتىر. جاقسى حاباردى قىزعانعانداي بولدى دەر كەي ارىپتەستەر. الايدا، اقيقاتى قىمبات. ەشقانداي دا شەتەلگە جەر بەرۋدى توقتاتاتىن زاڭ ماقۇلدانبادى. بۇل - 6 مامىر كۇنى پرەزيدەنت جاريالاعان ءموراتورييدى قۇقىقتىق تۇرعىدا قۋاتتاۋعا ارنالعان زاڭ جوباسى.

پرەزيدەنت نورمالارىن توقتاتا تۇرۋ تۋرالى موراتوريي جاريالاعان قۇجات باسقا ەمەس – زاڭ. ياعني، ۇكىمەت باسشىسىنىڭ نە وبلىس اكىمىنىڭ الدەبىر قاۋلىسى ەمەس، زاڭ شىعارۋشى ورگان، پارلامەنتتىڭ قوس پالاتاسى بىرىگىپ ماقۇلداعان زاڭ. زاڭ بولعاندا دا كودەكس. جەر كودەكسى. دەمەك، پرەزيدەنت قولدانىسقا ەنۋىنە ۋاقىتشا شەكتەۋ قويعان ونداعى كەي تالاپتار سول پارلامەنتتىڭ قاراۋىمەن تاعى ءبىر قۋاتتالۋى، موراتوريي ەنگىزۋ تۋرالى پرەزيدەنت جارلىعى زاڭمەن راسىمدەلۋى كەرەك بولعان. الايدا، بۇل، جەر شەتەلگە بەرىلمەيتىن بولدى دەگەن تالاپ ءبىرجولا قابىلداندى دەگەندى بىلدىرمەيدى. پرەزيدەنتتىكى موراتوريي تۋرالى جارلىق بولسا، بۇل - موراتوريي تۋرالى زاڭ. بولدى.  

ءبىر سوزبەن ايتقاندا، ءماجىلىس ماقۇلدادى دەگەن زاڭ دا «جەر كودەكسىنىڭ» داۋلى نورمالارىن تەك جىل اياعىنا دەيىن توقتاتا تۇرادى. مۇنى زاڭ قابىلداعان دەپۋتاتتار دا، وسى اۋىلشارۋاشىلىعى مەن جەر قاتىناستارىنا جاۋاپتى مينيستر اسقار مىرزاحمەتوۆ تە ايتىپ وتىر.

«بارلىعىمىز بىلەتىندەي، جەر قاتىناستارى سالاسىندا شىققان ماسەلەلەرگە بايلانىستى پرەزيدەنتتىڭ 2016 جىلدىڭ 6 مامىرىنداعى جارلىعى بويىنشا جەر كودەكسىنىڭ كەيبىر نورمالارىنا موراتوريي ەنگىزىلگەن بولاتىن. ناقتىلاپ ايتقاندا، بۇل ق ر 2015 جىلدىڭ 2 قاراشاسىنداعى «ق ر جەر كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭىنىڭ نورمالارىن جۇزەگە اسىرۋ؛ ەكىنشى ماسەلە، شەتەلدىكتەرگە ۇسىنۋ، ازاماتتىعى جوقتارعا، شەتەلدىك زاڭدى تۇلعالارعا، سونىمەن قاتار جارعىلىق كاپيتالىندا 50 پايىزدان اسا ۇلەسى شەتەلدىكتەردىڭ مەنشىگىندەگى زاڭدى تۇلعالارعا، اۋىل شارۋاشىلىق جەر ۋچاسكەلەرىن جالعا الۋ شارتىمەن ۇسىنۋعا. ءۇشىنشىسى، مەملەكەتتىڭ مەنشىگىندەگى اۋىلشارۋاشىلىعىنداعى جەر ۋچاسكەلەرىن جەكە مەنشىك قۇقىعىنا بەرۋ تۋرالى نورما»، - دەيدى ۆيسە-پرەمەر - اۋىل شارۋاشىلىعىنىڭ ءمينيسترى اسقار مىرزاحمەتوۆ.

ولاي بولسا، قۇقىقتىق قۇيتىرقىلىققا ءوزىمىزدىڭ بوي الدىرعانىمىز قالاي؟ ميلليونداعان قازاقتىڭ قابىرعاسىن قايىستىرىپ وتىرعان كۇردەلى ماسەلەدە جەڭىلتەكتىك تانىتۋعا، استا-توك اقپاراتقا ءات-ۇستى قاراۋعا بولا ما؟ بيلىك ورگاندارىنىڭ بيۋروكراتيالىق پروسەدۋرالارىنا بولا الاشتان ءسۇيىنشى سۇرايتىنداي نە كورىندى؟ «جەر ساتىلمايتىن بولدى. شەتەلگە ارەنداعا تىيىم سالىندى» دەپ كىمدى الدايمىز؟