حالىقارالىق اۋىر اتلەتيكا فەدەراسياسى لوندون وليمپياداسىنىڭ سىنامالارىن قايتا تەكسەرىپ، ناتيجەسىندە 4 قازاقستاندىق چەمپيوننىڭ: يليا يلين، ءزۇلفيا چينشانلو، ماييا مانەزا جانە سۆەتلانا پودوبەدوۆانىڭ قانىنان رۇقسات ەتىلمەگەن پرەپاراتتاردىڭ تابىلعانىن جاريالادى. ولار دوپينگ قولداندى دەگەن ايىپپەن تەرگەۋ اياقتالعانشا جارىستاردان شەتتەتىلگەن ەدى. ودان كەيىن ي. ءيليننىڭ بەيجىڭ وليمپياداسى كەزىندە تاپسىرعان سىنامالارىنان دا تىيىم سالىنعان زاتتار قۇرامى انىقتالعانى بەلگىلى بولدى.

وسى حاباردان سوڭ سپورت جانكۇيەرلەرى مەن بىلايعى جەلى قولدانۋشىلارى اراسىندا قىزۋ پىكىر-تالاس باستالىپ كەتتى. ءبىر توپ سپورتشىلارعا اراشا ءتۇسىپ، ولاردى بەلگىلى-بىر كۇشتەر قاساقانا ارانداتىپ وتىر دەگەن بولجامدارىن ايتسا، ەكىنشى توپ سپورتشىلاردىڭ شىنىمەن دە دوپينگ قولدانۋى مۇمكىن دەگەن ويلارىن دالەلدەۋگە تىرىسۋدا. اۋىراتلەتتەردى الاياق دەپ ايىپتاپ، ولاردىڭ حالىقتان كەشىرىم سۇراۋىن تالاپ ەتىپ جاتقاندار دا بار.

Abai.kz سايتىنا بىلدىرگەن پىكىرىندە ەلگە تانىمال سپورت ءجۋرناليسى ەسەي جەڭىس ۇلى حالىقارالىق ۇيىمنىڭ شەشىمىن قابىل الماسقا شارا جوقتىعىن ايتىپتى.

- حالىقارالىق اۋىر اتلەتيكا فەدەراسياسى (حااف) قازاقستان مەن تاعى بىرنەشە ەلدى ءبىر جىلعا بارلىق جارىستان شەتتەتۋ تۋرالى شەشىم شىعاردى. نازار اۋداراتىن ەكى ماسەلە بار. ءبىرىنشىسى، ايىپ ۋاقىتى ناقتى كورسەتىلمەگەن. ەكىنشىسى، ايىپقا جىعىلعان ەلدىڭ بارىنەن ريو وليمپياداسىنىڭ بىر-ەكى جولداماسى قايتارىلىپ الىندى. بۇدان شىعاتىن قورىتىندى قانداي؟ ايىپ ۋاقىتى ريودان كەيىن قولدانىلادى. ءقازىر ايىپتاپ جىبەرسە، حااف ونبەس داۋعا قالارىن ءتۇسىنىپ وتىرعان سياقتى. ويتكەنى، ءدال ريو دوداسى قارساڭىندا «ەجەلگى» سىنامالاردى اشىپ، ايدى اسپانعا قايتا شىعارعان «ايىبى» بار. سوندىقتان ريوعا شەكتەپ قاتىستىرادى، ءبىراق دوپينگ ايىبىنا ىلىنگەن زىلتەمىرشىلەردى وليمپياداعا جىبەرمەيدى. بۇل اۋىر اتلەتيكانى تازا سپورت جاساۋدىڭ جولى دەپ ءتۇسىندىرىپ جاتىر. دۇرىس تا شىعار. سوندا ءبىزدىڭ زىلتەمىرشىلەر بيىلعى وليمپيادادان كەيىن ءبىر جىل جارىستاردان شەت قالادى. اسا كوپ ۋاقىت ەمەس. ال وليمپيادادا 10 ەمەس، 8 اۋىر اتلەتىمىز (3 ايەل، 5 ەر) سىنعا تۇسەدى. مەنىڭ تۇسىنگەنىم وسى. 2008-2012 جىلدارداعى دوپينگتى انىقتاۋ ماسەلەسىندە ۇلكەن استار بار. ونى بىزگە جۋىق ارادا تۇسىندىرمەۋى دە مۇمكىن. سوندىقتان ولاردىڭ شەشىمىن قابىل الۋعا تۋرا كەلەدى، باسقا امال جوق.

ال، سپورت تاقىرىبىندا قالام تەربەپ جۇرگەن جۋرناليست رۋسلان مەدەلبەكتىڭ ويىنشا دوپين داۋىنان قانداي دا ءبىر ساياسي استار ىزدەۋدىڭ قاجەتى جوق كورىنەدى. ودان دا ەل بولىپ ريوعا بارۋ مۇمكىندىگى 1 پايىزعا تەڭەلىپ وتىرعان ي. يليننەن باسقا سپورتشىلاردىڭ كوماندا قۇرامىنا ءوتۋىن تىلەۋىمىز كەرەك.

- ياعني دوپينگ تەكسەرۋ بارلىق زاڭعا سايكەس جۇرگىزىلگەن. بۇل جەردە ەشقانداي زاڭ بۇزۋشىلىق جوق. ويتكەنى، حالىقارالىق انتيدوپينگ اگەنتتىگىنىڭ ەرەجەسى بار. كەز-كەلگەن حالىقارالىق جارىستا الىنعان دوپينگ سىنامالارى 10 جىل ساقتالادى جانە ول كەز-كەلگەن ۋاقىتتا قايتا تەكسەرىلەدى. سوعان سۇيەنىپ وتىر عوي. بۇل ەشقانداي زاڭ، ەرەجە بۇزۋشىلىق ەمەس جانە بۇل جەردەن ەشقانداي ساياسي استار ىزدەۋدىڭ قاجەتى جوق. ەگەر دە رەسەيدىڭ باتىسقا سالعان سانكسيالارىنىڭ كەسىرى ءتيىپ جاتىر دەيتىن بولساق قاتە بولادى. مۇمكىن ءدال وسى اۋىراتلەتيكاعا كەلگەن كەزدە بىزدەن قايتارىپ الاتىن ءۇش التىننىڭ ۇشەۋى دە رەسەي سپورتشىلارىنا تيەسىلى بولادى. ەگەر يلين، مانەزا جانە پودوۆەدوۆا قايتارىپ بەرەتىن بولسا، جاعداي رەسەيدىڭ پايداسىنا شەشىلەدى. ال رەسەي اتلەتتەرىنە دە بۇيىرماي، قولا العان سپورتشىلارعا بۇيىرادى دەسە، وندا مۇلدەم باسقا جاعداي بولادى. سوندىقتان بۇل جەردە حالىقارالىق اۋىراتلەتيكا فەدەراسياسى ناقتى شەشىم شىعارا الماي وتىر. سپورتشىلارىمىزدىڭ ريو وليمپياداسىنا قاتىسۋى ەكىتالاي. سەبەبى ۇلگەرمەيدى. بارلىعى حالىقارالىق وليمپيادا كوميتەتىنىڭ تارتىپتىك كەڭەسىنىڭ شەشىمىنە بايلانىستى. ءبىراق، ەشقاشان اۋىراتلەتيكادا بولسىن، باسقا سپورت تۇرلەرىندە بولسىن، جارىستان شەتتەتىلگەن سپورتشىلاردىڭ قايتىپ كەلۋى وتە قيىن.  بۇنى يلين دە، باسقا ءۇش اتلەتىمىز دە جاقسى تۇسىنەدى. ءيليننىڭ ريو وليمپياداسىنا ۇلگەرۋى ەكىتالاي. ەندىگى ماقسات – قالعان ءتورت التىندى ساقتاپ قالساق، مۇنىڭ ءوزى جەتىستىك بولار ەدى. ال قازاقستان قۇراماسىن ءبىر جىلعا شەتتەتۋ ايتىلعانمەن، ناقتى قاي ۋاقىتتا جۇزەگە اساتىنى بەلگىسىز. ياعني شەكتەۋ ۋاقىتى كورسەتىلمەگەن. ريو وليمپياداسىنا قاتىسپايدى دەپ ايتا المايمىز. ونى ءتىپتى حالىقارالىق اۋىراتلەتيكا كوميتەتى دە شەشە المايدى. شەشىمدى حوك ايتادى.  ونداعىلار بۇنى قاراپ، ءوز شەشىمىن جاقىندا شىعارادى. ءبىراق، سول ءبىر جىلعا جارىستان شەتتەتىلەدى. ول مۇمكىن ريو وليمپياداسىنان كەيىن كۇشىنە ەنۋى مۇمكىن. ءبىر بەلگىلى نارسە – قازاقستان ريو وليمپياداسىنا 10 اتلەت اپارا المايدى. ال ءيليننىڭ قاتىسۋى 1 پايىزدى عانا قۇرايدى. ءيليننىڭ باپكەرى ەرجاس بولتايەۆ تا بۇل جارىسقا ۇلگەرمەيتىنىن ايتتى عوي. مۇمكىندىك وتە از.  مانەزا، چينشانلو مەن پودوۆەدوۆالار قاتىسىپ جاتقاننىڭ وزىندە ءيليندى جىبەرمەۋى مۇمكىن. سوندىقتان، ءبىز جالپى قۇرامانىڭ وليمپياداعا قاتىسۋىن تىلەۋىمىز كەرەك.