«حابار» ارناسىندا ءجۇرىپ جاتقان «جۇلدىزدار ايتىسادى» توك شوۋى شەتەلدىك جوبالارمەن يىق تەڭەستىرە الاتىن بىرەگەي وتاندىق جوبا رەتىندە دارىپتەلۋدە.

ءىس جۇزىندە، ورىسشا ايتىس جاساپ، ەسترادالىق اندەردىڭ اۋەنىن ماقام قىلىپ، ايتىستى شوۋعا اينالدىرعان تەلە ارنالاردىڭ پروديۋسەرلەرى نەمەسە كۆن-شىكتەردىڭ اتامانى ەمەس، قازىرگى قازاق ايتىس ونەرىنىڭ ۇزدىك وكىلى بالعىنبەك يماشيەۆ بولاتىن. بۇدان تالاي جىل بۇرىن، ۇكىمەتباسى كارىم ءماسىموۆ باستاعان شەنەۋنىكتەر تاماشالاعان ايتىستا «Eكى تىلگە بىردەي جەتتىك ەدىم» دەگەن بالعىنبەك ارىپتەسى ريناتتى ورىسشا ايتىسۋعا شاقىرىپ، رەسمي تىلدە ايتىس ۇلگىسىن كورسەتىپ، كوپشىلىك كوڭىلىنەن شىققان. بالعىنبەكتىڭ جاڭالىعى ول عانا ەمەس، ەجەلگى ماقامدارمەن بىرگە ەسترادالىق اندەردىڭ اۋەندەرىن شەبەر پايدالانا بىلۋىندە. جەكە ستيلىنە ايلاندى دەسەدە بولادى. مارقۇم ەرجان سەرىكبايەۆتىڭ «شىمكەنت سىراسى»، «تاڭعى قالا»، «مەيلى» اندەرىنىڭ، تاعى باسقا دا حيت اندەردىڭ اۋەنىمەن توگىلتكەن شۋماقتارى ەل اۋزىندا ءجۇر.

 دايىن اسقا كىم تىك قاسىق بولماسىن؟! ىلە-شالا رەسەيلىكتەردىڭ «ناشا راشا» جوباسىنىڭ ءوڭىن ايلاندىرىپ، «ناشا كازاشا» دەپ ۇسىنعان نۇرتاس ادامبايەۆ اۋزىمەن دومبىرا ويناپ، ورىسشا ماندىرايتىن اقىن وبرازىنا ەنىپ، ورىس ءتىلدى قاۋىمدى كۇلكىگە كەنەلتكەن.

العاشىندا كونسەرت فورماسىندا وتكەن «جۇلدىزدار ايتىسادى» جوباسى ەفيردە كورسەتىلگەننەن-اق سىننىڭ استىندا قالعان ەدى. «حابار» ارناسىنىڭ جوقتان تاپقانداي، فoرماتىن وزگەرتىپ، قايتا ۇسىنعانىنا جول بولسىن.

رينات زايىتوۆ ءبىر كەزدە، ايتىس اقىندارىنىڭ بىر-بىرىنە ايتارلارىن الدىن-الا جازىپ كورسەتىپ، ءوزارا كەلىسىپ الىپ ايتىساتىنىن جايىپ سالعان ەدى. «جۇلدىزدار ايتىسادى» جوباسى سونىڭ ناقتى كورىنىسى. جازىپ بەرگەندى جاتتاپ الىپ، ساحنادا جاڭا قىرى اشىلعان ادۋىندى اقىن بەينەسىنە ەنگەن جۇلدىزداردىڭ تىرلىگى ايتىستان-گورى ءاجۋاعا سايادى. قازاقتىڭ ايتىس ونەرىنىڭ جانى – سۋىرىپ سالمالىق ەكەنىن ەسكەرسەك، جوبانى ۇسىنۋشىلاردىڭ ارەكەتى ايتىستى ءوسىرۋ مە، الدە ءوشىرۋ مە؟

ەسبول ۇسەن ۇلى