پاۆلوداردا جاڭبىر ارالاس سوققان جەل تۇرعىنداردى جارىقسىز، سۋسىز قالدىردى. سەكۋندىنا 20 مەترگە دەيىن ۇيىتقىعان داۋىل شاھارداعى بىرنەشە كاسىپورىننىڭ شاتىرىن جۇلىپ تۇسىرگەن، دەپ حابارلايدى Qamshy.kz كتك ارناسىنا سىلتەمە جاساپ.
قاتتى جەلگە تالاي جىلعى تەرەكتەر دە شىداس بەرمەي، اۋلادا تۇرعان كولىكتەردى باسىپ قالدى. ابىروي بولعاندا، زارداپ شەككەندەر جوق. ءبىراق جاۋىن ارالاس سوققان جەل كوشەدەگى ايالدامالاردى زاقىمداپ، تۇرعىن ۇيلەر مەن بىرنەشە كاسىپورىننىڭ شاتىرىن جۇلىپ كەتكەن. كەشكى ۋاقىتتا ويران سالعان داۋىلدان ەلەكتر سىمدارى تۇيىقتالىپ، 300-گە جۋىق ءۇي جارىقتان اجىراتىلدى. اپات سالدارىنان كەي اۋدان تۇرعىندارىنا بىرنەشە ساعات سۋسىز وتىرۋعا دا تۋرا كەلىپتى. ەندى شىعىن كولەمىن ەسەپتەۋ ءۇشىن اكىمدىكتە ارنايى كوميسسيا قۇرىلماق.
