ەراسىل اۋباكىروۆتىڭ ءولىمى بويىنشا ىستە كۇدىكتى ايان مەيىربايەۆ كەپىلاقىمەن بوساپ شىقتى، - دەپ حابارلايدى Qamshy.kz Tengrinews.kz -كە سىلتەمە جاساپ.
"ق ر ءىىم تەرگەۋ دەپارتامەنتى، ناقتىراق ايتقاندا تەرگەۋ توبىنىڭ جەتەكشىسى دۇمشەبايەۆ ا. مەيىربايەۆتى قاماۋدا ۇستاۋ تۇرىندەگى بۇلتارتپاۋ شاراسىن الىپ تاستادى. قازىرگى ۋاقىتتا مەيىربايەۆ ا. قىلمىستىق ءىس بويىنشا كۇدىكتى"، - دەپ حابارلادى استانا پروكۋرورىنىڭ ورىنباسارى بايشولاقوۆ.
قىلمىستىق ءىس بويىنشا سوتقا دەيىنگى تەرگەۋ جالعاسىپ جاتىر. پروكۋراتۋراداعىلار قىلمىستىق ءىستىڭ وزگە ءمان-جايىنىڭ تەرگەۋ مۇددەسىنە بايلانىستى جاريا ەتىلمەيتىنىن مالىمدەپ وتىر.
سونداي-اق، ءىىم رەسمي وكىلى الماس سادۋبايەۆ ايان مەيىربايەۆقا قاتىستى قىلمىستىق قۋدالاۋ توقتاتىلعانىن مالىمدەدى.
"2016 جىلدىڭ 7 مامىرىندا استانانىڭ پروكۋراتۋراسى مەيىربايەۆقا قاتىستى قىلمىستىق كودەكستىڭ 163-بابىنىڭ تارتىبىندە قاماۋعا الۋ تۇرىندەگى بۇلتارتپاۋ شاراسى الىپ تاستالدى. ول بوساتىلدى"، - دەپ مالىمدەدى سادۋبايەۆ.
ءىىم مالىمەتىنشە، مەيىربايەۆقا قاتىستى قىلمىستىق قۋدالاۋ ونىڭ ارەكەتتەرىندە قىلمىس قۇرامىنىڭ جوقتىعىنا بايلانىستى توقتاتىلعان.
ەسكە سالايىق، 23 جاستاعى ەراسىل اۋباكىروۆتىڭ زورلىق بەلگىلەرى بار ءمايىتىن پوليسەيلەر 10 اقپاندا تاپقان بولاتىن. كىسى ءولتىردى دەگەن كۇدىكپەن ءتورت ادام ۇستالدى. ەراسىل اۋباكىروۆ ەلورداداعى مەديسينالىق ۋنيۆەرسيتەتتىڭ التىن كۋرسىنىڭ ستۋدەنتى ەدى. ول 3 اقپاندا ۇيىنەن شىعىپ كەتىپ، قايتا ورالماعان. كەلەسى كۇنى ونىڭ جوعالعانى جايلى حاباردى دوستارى تاراتتى.
