الدىن الا مالىمەتتەر بويىنشا، ىستامبۇلداعى جارىلىستار سالدارىنان قازا تاپقانداردىڭ جانە جاپا شەككەندەردىڭ اراسىندا قازاقستان ازاماتتارى جوق، - دەپ حابارلايدى Qamshy.kz قازاقپاراتقا سىلتەمە جاساپ. 

«قازىرگى تاڭدا، ىستامبۇلداعى جارىلىستار سالدارىنان قازا تاپقانداردىڭ جانە جاپا شەككەندەردىڭ اراسىندا قازاقستان ازاماتتارى جوق. قازاقستاننىڭ باس كونسۋلدىعى اقپاراتتى انىقتاپ جاتىر. قوسىمشا مالىمەتتەر حابارلانادى»، - دەدى ق ر ءسىم باسپا ءسوز قىزمەتىنىڭ باسشىسى  ءانۋار جايناقوۆ تەلەفون ارقىلى تىلشىلەرگە بەرگەن سۇحباتىندا.

سونداي-اق، قازاقستان 2016 جىلعى 28 ماۋسىمدا ىستامبۇل قالاسىندا ورىن العان تەرروريستىك اكتىنى قاتاڭ ايىپتايدى. بۇگىن ق ر سىرتقى ىستەر مينيسترلىگى وسىنداي مالىمدەمە تاراتتى.

«تۇركيا ۇكىمەتىنە جانە باۋىرلاس حالىققا، وسى زۇلىمدىق ارەكەت قۇرباندارىنىڭ تۋىستارى مەن جاقىندارىنا قايعىرىپ كوڭىل ايتامىز.قازاقستان تەرروريزمنىڭ كەز كەلگەن كورىنىسىنە قارسى ىمىراسىز كۇرەستى ءوزىنىڭ تولىق قولدايتىنىن راستاي وتىرىپ، تەرروريزمگە قارسى كەڭ اۋقىمدى حالىقارالىق كواليسيا (جەلى) قۇرۋ ارقىلى وسى باعىتتاعى حالىقارالىق ارەكەتتەردى ۇلەستىرۋدى بارىنشا نىعايتۋعا شاقىرادى»،  - دەلىنگەن مالىمدەمەدە.

ەسكە سالا كەتەيىك، ىستامبۇلدىڭ حالىقارالىق اۋەجايىندا جارىلىس بولدى. وقيعا سالدارىنان ءتۇرلى دەرەكتەرگە سايكەس 31-32 ادام قازا تاپقان. سوڭعى مالىمەت بويىنشا 147 ادام زارداپ شەككەن.  جارىلىستار سەرياسى حالىقارالىق تەرمينالدا ورىن الدى.