قاراعاندىدا تاعى ءبىر ادام كۇيدىرگى دەرتىن جۇقتىردى دەگەن كۇدىكپەن اۋرۋحاناعا ءتۇستى. 24 جاستاعى جىگىت قاراعاندى مەديسينالىق ۋنيۆەرسيتەتىنىڭ 5 كۋرس ستۋدەنتى ەكەن. ەمدەۋ مەكەمەسىندە تاجىريبەدەن ءوتىپ جۇرگەن ول ناۋقاستى قاراۋعا قاتىسىپتى، دەپ حابارلايدى Qamshy.kz كتك ارناسىنا سىلتەمە جاساپ.

ودان الىنعان سىنامالار ساراپتاماعا جىبەرىلگەن. ال كارانتين جاريالانعان ەركىندىك اۋلىندا تاعى ءبىر سيىر ارام قاتتى. ءىرى قارا كەسەل جۇقتىردى ما الدە زالالسىزداندىراتىن دارىلەردەن ۋلاندى ما، سونى ءقازىر ۆەتەرينارلار انىقتاۋدا. جالپى، دەرت وشاعى –ەركىندىكتە اۋرۋ جۇقتىرعاندارمەن بايلانىستا بولعان 73 ادام دارىگەرلەردىڭ باقىلاۋىندا. اۋىلدا زالالسىزداندىرۋ شارالارى دا ءۇزىلىسسىز ءجۇرىپ جاتىر. ماماندار اۋرۋ تاراتۋى مۇمكىن دەپ 47 قاڭعىعان يت پەن مىسىقتى ۇستاپ ورتەپ جىبەرگەن. ال ارام ولگەن تايىنشانىڭ دەنەسىنەن سىنامالار الىنىپ، ارنايى ساراپتاماعا جىبەرىلىپتى.