تانىمال ءانشى تورەعالي تورەالى شىمكەنتتە شۋ شىعاردى. سەبەبى ول بىردەن اشۋعا بۋلىعىپ، ونىڭ قاسىنا اكەسى ءارى پروديۋسەرى دە قوسىلىپ، ءىس شاراعا كەلگەن ءبىر توپ جۋرناليستەرگە سۇحبات بەرۋدەن باس تارتتى، - دەپ حابارلايدى Qamshy.kz Nur.kz -كە سىلتەمە جاساپ.

بۇگىن شىمكەنتتە تانىمال ءانشى تورەعالي تورەالىنىڭ «ۇلى دالا بالاسى» اتتى كونسەرتى وتەدى. كونسەرتكە دەيىن وتاندىق ءونىمدى قولداۋ ماقساتىندا «نازار تەكستيل» كىلەم فابريكاسىنا ات باسىن بۇرعان جۇلدىز ون ەكى مىڭ تەڭگەگە كىلەم ساتىپ الدى. ماقسات –  وتاندىق ءونىمدى تانىمال ادامدار ارقىلى جارنامالاۋ.

كونسەرت الدىندا كەلۋگە كەلىسىم بەرگەن جاس ءانشى بەلگىلەنگەن ۋاقىتتان بىرنەشە ساعاتقا كەشىگىپ كەلىپ، مۇنان سوڭ ونەردەگى ارىپتەسى قايرات نۇرتاسقا ۇقساعىسى كەلدى مە، ايتەۋىر كوزىلدىرىگىن شەشپەي تۇرىپ الدى. قولىن ارتقا ايقاستىرىپ شىرەنىپ تۇرعان انشىدەن ءبىر جۋرناليست قولىن ءتۇسىرىپ سۇحبات بەرۋدى سۇرانعانى سول ەدى ول بىردەن مىنەزىن كورسەتىپ، وعان اكەسى قوسىلا كەتىپ، دورەكىلەنە جونەلدى.

ءتىپتى ەلگە سىيلى بولىپ جۇرگەن تورەعاليدىڭ اكەسى «سەندەردى كىم شاقىردى؟» دەپ ءمان-جايدى ۋشىقتىرىپ جىبەردى. الايدا بۇل شاراعا ءبىر توپ تىلشىلەر قاۋىمىن وبلىستىق اكىمدىكتىڭ باسپا ءسوز قىزمەتى ارنايى شاقىرعان بولاتىن.

«ۇلى دالا بالاسى» دەگەن تاقىرىپپەن كەش بەرگەلى وتىرعان ءانشى «ۇلى مىنەزىن» وسىلايشا بايقاتىپ قويدى.