وسىدان بىرنەشە كۇن بۇرىن تانىمال ءانشى كارينا ابدۋللينا ءوزىنىڭ Facebook پاراقشاسىندا ءبىر جىگىتتى ىزدەيتىنىن ايتقان بولاتىن.

“بۇگىن “ريتس پالاس” جانىنداعى جانارماي بەكەتتەرىنىڭ بىرىندە جاس جىگىتپەن كوزىمىز ءتۇيىسىپ قالدى. ول ماعان قادالىپ قاراپ تۇردى، مەن دە كوزىمدى الماي ۇزاق قارادىم. كەزەك كوپ بولعان سوڭ ورىندى بوساتۋىم كەرەك بولىپ اسىعىس ءجۇرىپ كەتتىم. ءبىراق سول ءسات ەسىمنەن كەتەر ەمەس. جىگىت! فەيسبۋك جەلىسىندە بار بولساڭ، ماعان جەكەگە جاز. سەنىڭ كوزىڭنەن ءوزىم ىزدەگەن دۇنيەلەردى تاپتىم”، – دەپ جازعان ەدى كارينا ابدۋللينا.

Caravan.kz مەديا-پورتالى بۇل حيكايانىڭ نەمەن اياقتالعانىن انىقتادى، - دەپ حابارلايدى Qamshy.kz.

- شىنىمدى ايتسام، مەنىڭ جازبام وسىنشالىقتى قىزىعۋشىلىق تۋدىرىپ، كوپشىلىكتىڭ قولداۋىنا يە بولامىن دەپ كۇتكەن جوقپىن، دەيدى كارينا.  - تانىمال ءانشى بولىپ، حالىقتىڭ الدىندا جۇرگەندىكتەن ەلدىڭ ماعان دەگەن كوزقاراسىنا ۇيرەنگەنمىن. ءبىراق بۇل كوزقاراس مۇلدەم ەرەكشە بولدى.  سول سەبەپتى دە ۇيگە كەلگەن بويدا، وسى جازبانى جازىپ شىعاردىم. ماعان قانشاما جىگىتتىڭ حات جازعانىن بىلسەڭىزدەر عوي! كەزدەسۋگە شاقىرىپ، ءتىپتى ۇسىنىس جاساعان جۇزگە جۋىق حابارلاما كەلدى. ولاردى جازعان بارلىق جىگىتكە العىسىمدى ايتامىن. الايدا سولاردىڭ ىشىنەن ءوزىم ىزدەپ جۇرگەن جىگىتتىڭ حابارلاماسىن تاۋىپ الدىم. نەسىن جاسىرايىن، قۋانىشتان توبەم كوككە جەتتى.  

- ءسىزدى ءوز كوزقاراسىمەن باۋراپ العان جىگىت كىم بولدى ەكەن؟ وتباسىن قۇرعان با؟

- جوق، بويداق. وتە سىمباتتى جىگىت. زاڭ قىزمەتكەرى. جاقىنىراق تانىسا كەلە، ونىڭ وتە ءبىلىمدى، اقىلدى ادام ەكەنىنە كوزىم جەتتى. ولەڭ شىعارادى، ءان ايتادى، ءتىپتى ازداپ گيتارادا دا وينايدى. سونىمەن قاتار، «ميۋزيكولا» توبىنىڭ شىعارماشىلىعىن ءسۇيىپ تىڭداپ، قۇرمەتپەن قارايتىنى مەنى قۋانتتى.

- ول باقىتتى جاننىڭ ەسىمى كىم؟

- بۇل قۇپيا.