ق ر پرەزيدەنتى نۇرسۇلتان نازاربايەۆ الداعى ۋاقىتتا وتەتىن ۇكىمەتتىڭ كەڭەيتىلگەن وتىرىسىندا حالىقتىڭ تابىسىن ارتتىرۋ مەن جۇمىسپەن قامتۋدى قولداۋعا قاتىستى تىڭ ۇسىنىستارىن جاريالايدى، - دەپ حابارلايدى Qamshy.kz قازاقپاراتقا سىلتەمە جاساپ.

بۇگىن التىنشى سايلانعان ق ر پارلامەنتىنىڭ ەكىنشى سەسسياسىن اشۋ بارىسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي مالىمدەدى.

ءسوز اراسىندا ەلباسى بۇگىنگى كۇنى الەمدىك ەكونوميكالىق، ساياسي احۋال كۇردەلى كۇيدە قالىپ وتىرعانىنا نازار اۋدارىپ، كوپتەگەن دامىعان جانە دامۋشى ەلدەر قيىندىقتى باستان كەشىپ وتىرعانىنا نازار اۋداردى. «باعانىڭ قۇلدىراۋى، الەمدىك نارىقتاعى تۇراقسىزدىقتار حالىقارالىق ساۋدانى السىرەتتى. ينۆەستيسيالىق اعىمدار ازايىپ، ەلدەر اراسىنداعى تاۋار اينالىمى، ەكسپورت پەن يمپورت الماسۋ تومەندەدى. مۇنىڭ ءبارى قازاقستانعا اسەر ەتپەي قويمايدى، ءبىز الەم ەكونوميكاسىنىڭ ءبىر بولشەگىمىز. ءبىز وسىعان بايلانىستى بارلىق باعىتتار بويىنشا قارجى ۇنەمدەۋگە ءماجبۇر بولدىق. ەكونوميكاعا ينۆەستيسيالار قىسقاردى، سونىڭ ىشىندە الەۋمەتتىك نىسانداردى قارجىلاندىرۋ ازايدى، كەيبىر قابىلدانعان شەشىمدەر قايتا قارالىپ جاتىر. سوعان قاراماستان، ءبىزدىڭ باعدارلامالار ءسوزسىز ورىندالادى. دەگەنمەن، ءومىردىڭ ءوزى بىزدەن قاراجاتتى جۇمساۋدا اسا ماڭىزدى ىستەرگە كوبىرەك كوڭىل ءبولۋدى تالاپ ەتىپ وتىرعانى شىندىق. وسىنداي جاعدايدا ۇكىمەتتىڭ، ۇلتتىق بانكتىڭ داعدارىسقا قارسى ءىس قيمىل جوسپارى جالعاساتىن بولادى»، - دەدى ن. نازاربايەۆ.

بۇل رەتتە ەلباسى قىركۇيەك ايىنىڭ العاشقى ونكۇندىگىندە ۇكىمەتتىڭ كەڭەيتىلگەن وتىرىسى وتەتىنىن ايتىپ ءوتتى. «وسى وتىرىستا مەن جۇمىسپەن قامتۋدى قولداۋ جانە حالىقتىڭ تابىسىن ارتتىرۋعا قاتىستى جاڭا شارالاردى ۇسىناتىن بولامىن. ياعني، ەكونوميكا تەرەڭ تىنىس الىپ، دامۋى ءۇشىن جاڭا قاراجاتتار تارتۋ جولدارى، بانكتەردىڭ جۇمىسىن جانداندىرۋ جانە جەرگىلىكتى جەرلەردەگى مۇمكىندىكتەردى كەڭەيتۋ قاراستىرىلاتىن بولادى»، - دەدى مەملەكەت باسشىسى.