الماتى وبلىسىندا مال ساۋداسىمەن اينالىسقان ءۇش اعايىندىنىڭ ولىمىنە بازاردا ۇرىلاردىڭ قاپتاۋى سەبەپ! قاندىقول قىلمىستان كەيىن ساۋداعا شىعۋعا جۇرەگى شايلىعىپ قالعان ساۋداگەرلەر وسىلاي دەپ وتىر. ولار ۇزىناعاشتاعى مال بازارىن ۇرىلاردىڭ بۇرىننان جاعالاپ جۇرگەنىن ايتادى. سۋىق قولدىلاردىڭ قۇنىققانى سونشا، ءتورت تۇلىكتەن تۇسكەن قىرۋار قارجىنى ءاربىر ساۋدا سايىن قاعىپ اكەتە بەرەدى ەكەن. ال سوڭعى رەت قاراقشىلاردىڭ مالدى يەسىمەن قوسا ۇرلاپ كەتكەنى ءمالىم، - دەپ حابارلايدى Qamshy.kz كتك ارناسىنا سىلتەمە جاساپ.

ءمايىتى تاۋدا تابىلعان ءۇش اعايىندى – جارقىنبەك، قادىلبەك جانە مۇقيات سوڭعى رەت وسى بازاردان كەتكەن. ءقازىر مۇندا مال ساۋداگەرلەرىنىڭ ءىرى قارامەن كەلۋگە جۇرەكتەرى شايلىعىپ قالعان. ويتكەنى ۇرىلار تىم ەركىنسىنىپ كەتىپتى. سەبەبى، سول اعايىندىلار جوعالار كۇنى مۇندا تاعى 15 تۇياق ۇرلانعان.           

كارىمحان ءنابي، ساۋداگەر:

- وسىعان  قاراقشىلاردىڭ قاتىسى بار  دەگەن كۇدىگىمىز  بار.

اعايىندىلارمەن بىرگە مال ساۋداسىمەن اينالىسقاندار مۇندا ءار بازار بولعان سايىن ۇرى-قارى قارىق بولىپ قايتادى دەيدى. وندا دا ميللونداپ ولجالايدى ەكەن. ماسەلەن، ەسبولات ماعازدىڭ قاراقشىلار ءبىر اي بۇرىن باقانداي 4 ميلليون تەڭگەسىن بازار ىشىندە قاعىپ كەتكەن.

ەسبولات ماعاز، ساۋداگەر:

-وسى بازاردىڭ ىشىندە  ونشاقتى ادامبار.ساۋداگەرلەردى اڭدىپ، اقشا ۇرلايدى. بۇل  وتكەن جىلدان باستالعان.

وزدەرىنىڭ ايتۋىنشا، ۇزىناعاشتاعى مال بازارىندا اقشاسىن ۇرلاتپاعان ادام جوق ەكەن. پوليسياعا شاعىمدانعانىمەن، بىردە-بىرىن تاۋىپ بەرمەگەن. اقىرى قولىن ءبىر سىلتەپ، ارىز جازۋدى دا قويىپتى.

ءادىل قىزىر ۇلى، ساۋداگەر:

- بىلتىر كۇزدە 840 مىڭ تەڭگە اقشا جوعالدى ماشينادان.

ساياحات سالتانات ۇلى، ساۋداگەر:

- مالدى ساتىپ 870 مىڭدى الدىن-الا تولەم رەتىندە العانبىز.  قالعانىن كەيىننەن الاتىن بولدىق. وسى اقشانى تۋرا قالتامىزدان قاعىپ كەتتى.

سوراقىسى سول، بۇل وقيعالاردىڭ ءبىرى دە كامەراعا تۇسپەگەن.

قىرىق باس سيىرمەن جوعالىپ، ارتىنشا ولىگى تابىلعان ءۇش بىردەي ارىستاي ازامات جارقىنبەك، قادىلبەك، مۇقيات سوڭعى رەت مىنە وسىندا ساۋدا جاساپ تۇرىپتى. سوڭعى رەت ول كىسىلەردى كۋاگەرلەر سەنبى كۇنى تاڭعى سەگىزدە كورگەن، ال كۇندىزگى ساعات 11-لەردە سيىرلار تيەلگەن جۇك كولىگى بازاردان سىرتقا شىعىپ كەتكەن. ءبىراق وكىنىشكە قاراي بازار اۋزىندا تۇرعان 6 بىردەي كامەراعا ول ءۇش ازامات تا ولاردىڭ سيىرلارى دا، ولاردى الىپ كەتكەن كۇدىكتىلەردىڭ ءبىرى دە تۇسپەپتى.

كامەراعا تۇسپەگەنىمەن، كۇدىكتىلەردىڭ ءبىرى – تالعات دەگەندى ساۋداگەرلەر تانىپ قويىپتى.    

ەسبولات ماعاز، ساۋداگەر:

-تالعات دەگەن جىگىتتى ءوزى «ۇرى» دەپ ايتادى. ءىنىسى وتىرىپ كەلگەن 15-16 جىل.

اعايىندىلاردىڭ ولىمىنەن كەيىندە مال بازارىندا ساقتىق شارالارى كۇشەيتىلمەپتى.  

ەركىن جۇمابايەۆ، بازار كۇزەتشىسى:

-وزدەرى جاۋاپ بەرەدى عوي.

 -كىم وزدەرى؟

– كەلگەن ادام ءوزىنىڭ مۇلكىنە مالىنا  يە بولادى. وعان جاۋاپ بەرە المايمىز ءبىز. 

وسىلاي دەپ كۇلگەن كۇزەت ءىرى قارا ساتاتىنداردىڭ قاۋىپسىزدىگىنە جاۋاپ بەرمەيمىز دەپ وتىر. ەسەسىنە، ءاربىر مال باسىنا، ونى الىپ كەلگەن كولىككە دە 700 تەڭگەدەن سالىق جينالادى ەكەن.