انشىلەردەن باسقا ايتىلار اڭگىمە جوق پا؟ كۇن سايىن وسى سۇراقتى قايتالاۋعا ءماجبۇر بولامىز. تەلەارنالار انشىدەن باسقا ادام جوق دەي مە، ايتەۋىر، باعدارلامالارى دا انشىلەر جايلى، جۇرگىزۋشىلەرى دە انشىلەر. «حابار» ارناسىنداعى كەزەكتى جاڭا باعدارلاما دا سول تاپتاۋرىن تاقىرىپقا تاعى جابىسىپتى.

1

قايدا قاراساڭ دا (تەلەديداردى ايتامىن) ءارتىس. ولاردان اسقان بەدەلدى، سۇرانىسقا يە جان جوق.  جالپى، انشىلەردىڭ وزىنە ايتار وكپە-نازىم ءنول. ولار شاقىرۋسىز قالماس ءۇشىن شاقىرعاننان قالمايتىن ادامدار. بار بولعانى سول عانا. ماسەلە – شاقىرعىشتاردا.

2

كەشە كەشكە جاقىن «حابار» ارناسىن قوسىپ قالدىم. سويتسەم، جولىم بولىپ تۇساۋكەسەرگە تاپ بولىپپىن (شىن مانىندە 25 قىركۇيەك كۇنى كورسەتىلگەن ساننىڭ قايتالاۋى ەكەن، كەيىن ءبىلدىم). كورەرمەنگە جول تارتقان سۋ جاڭا باعدارلامانىڭ اتاۋى – «كومپرومات». اتاۋىنا قاراپ ەرەكشە ءبىر دۇنيەنى كۇتكەنىم راس. ءدال نە نارسە ەكەندىگىن ءدوپ باسىپ ايتا المايمىن. ايتەۋىر انشىلەر جايلى كەزەكتى شوۋ دەپ ويلاماعانىم انىق.

3

ءوز باسىم مۋزارتتىق ساكەن مايعازييەۆتى قاتتى قۇرمەتتەيمىن. ءبىر رەت تەلەفونمەن سويلەسكەننەن اق جاقسى ادام ەكەندىگى بايقالدى. ءبىراق مەن ونىڭ «توقالى بار ما؟ ايەلىڭىزبەن ۇرسىساسىز با؟ شىنىمەن دە ءمىنسىز ادامسىز با؟ اڭساعان قانداي ارماندارىڭىز بار؟»  سۇراقتارىنا بەرەر جاۋابىن بىلگىم كەلمەيدى. بۇل سۇراقتارعا جاۋاپ ىزدەيتىن، انشىلەردەن سۇحبات الاتىن ارنايى گازەت-جۋرنالدار بار. ارنايى ءتىپتى مۋزىكالىق ارنالار بار. قالاعان كەزدە سول باسىلىمدى ساتىپ الىپ وقيمىن نە «گاككۋگە» اۋىستىرامىن. «حابار» اگەنتتىگى پرايم-تايم ۋاقىتىندا وسىنداي «وزەكتى» ماسەلەنى تالقىلاعانىن قالامايمىن.

4

قازاق سىن ايتقاننان، ءمىن تاپقاننان باسقا ەشتەڭە بىلمەيدى دەپ مەنى بىرەۋلەر سىناپ وتىرعان شىعار. ونىڭىز دا دۇرىس. ءوز كەزەگىمدە قوعامعا شىنىمەن دە كەرەك تاقىرىپ تۋرالى تولعانباي، قالام تارتپاي، جەڭىل شوۋ جايلى پىكىر ءبىلدىرىپ وتىرعان وزىمە اشۋلىمىن. ءبىراق، ەكرانعا تەلمىرىپ تاربيە الىپ جاتقان حالىقتى ويلاسام ۇندەمەسكە بولمادى. دارىندى جاستارعا باعىت-باعدار بەرىپ، باعىن اشىپ، جۇلدىزىن جارقىراتىپ، ونەردىڭ ۇلكەن ساحناسىنان كورىنۋگە جولداما بەرۋ («جاندى داۋىس»، «مۋزارت live») – ءبىر باسقا، پالەنباي مينۋت بويى ءبىر انشىگە قيتۇرقى سۇراقتار قويۋ، سونى ماقسات تۇتۋ – ءبىر باسقا.

5

كومپرومات دەگەنىمىز بەلگىلى ءبىر ادامنىڭ جاسىرىپ قالعىسى كەلگەن دۇنيەلەرىن دالەل-دايەك بولاتىن قاعاز، فوتوسۋرەت، بەينەماتەريال ارقىلى جالپىعا جاريا ەتۋ. سوندىقتان كومپروماتتى ونەر ادامدارىنا ەمەس ەكى سويلەگەن، ۋادەسىنەن تايعان (تاۋ باسىنداعى كوتتەدجىن سالدىرتىپ الىپ قۇرىلىسشىعا ءناپاقاسىن بەرمەگەن)، ادەپسىزدىك، دورەكىلىك تانىتقان (الدىنا جۇمىس سۇراپ كەلگەن قارشاداي قىزدى كوفە ىشۋگە كافەگە شاقىرعان) حالىق قالاۋلارىنا، بيزنەسمەندەرگە ۇسىنۋ قيسىندىراق بولار ما ەدى؟! 

جازيرا بايدالى