الماتى وبلىسى كوكسۋ اۋدانىنىڭ باسشىلىعى جامبىل اۋدانىندا قىلمىسكەرەر قولىنان قازا تاپقان ءۇش ازاماتتىڭ ءبىرى جارقىنبەك دولدان ۇلىنىڭ بالاسى جۇرەك تالماسىمەن اۋرۋحاناعا ءتۇستى دەگەن اقپاراتتى جوققا شىعاردى، - دەپ حابارلايدى Qamshy.kz اكىمدىكتىڭ باسپا ءسوز قىزمەتىنە سىلتەمە جاساپ.

اكىمدىكتىڭ حابارلاۋىنشا، بۇگىن جامبىل اۋدانىندا كوز جۇمعان دولدان ۇلى جارقىنبەك پەن زارىلقان ۇلى مۇقياتتىڭ جەتىسى مۇقىرى اۋىلدىق وكرۋگىنە قاراستى «قازاقستاننىڭ 10 جىلدىعى» اۋىلىنىڭ مەشىتىندە بەرىلگەن. وسى كۇنگە وراي، informburo.kz اقپاراتتىق پورتالى  دولدان جارقىنبەكتىڭ 13 جاسار ۇلى جۇرەك تالماسىمەن اۋرۋحاناعا ءتۇستى دەگەن اقپار تاراتىپ، بۇل حاباردى وزگە باق-تار ارى قاراي تاراتقان.

الايدا، كوكسۋ اۋدانىنىڭ ىشكى ساياسات ءبولىمىنىڭ باسشىسى جانار كۋبييەۆا بۇل اقپاردىڭ شىندىققا جاناسپايتىندىعىن العا تارتۋدا.

«قايتىس بولعان دولدان جارقىنبەكتىڭ ۇلى جارقىنبەك جالىن اكەسىنىڭ قازاسىنان كەيىن كونىل- كۇيى بولمادى، باسقاداي دەنساۋلىعىنا قاتىستى شاعىم-سۇرانىس بولماعان. مارقۇم زارىلقان مۇقياتتىڭ زەينەتكەر اناسى قوجا باتەن  كوپ جىلدارى دەنساۋلىعىنا بايلانىستى مەرزىمدى ەم الىپ جۇرگەن. قازىرگى تاڭدا اۋداندىق ەمحانادا ەمدەلۋدە»، – دەيدى جانار كۋبييەۆا.

اۋداندىق ىشكى ساياسات ءبولىمى باسشىسىنىڭ ءسوزىن مۇقىرى اۋىلدىق وكرۋگىنىڭ اكىمى دانيار بەليجانوۆ تا راستاپ وتىر. اكىمنىڭ سوزىنە سۇيەنسەك، اۋىر قىلمىستىڭ قۇربانى بولعان جارقىنبەك پەن مۇقياتتىڭ وتباسىنا بۇگىندە ءجىتى كوڭىل بولىنۋدە. ال، اۋرۋحاناعا ءتۇستى دەگەن اقپارات شىندىققا مۇلدە جاناسپايدى.