تانىمال ءانشى ەركە ەسماحاننىڭ بۇرىنعى كۇيەۋى اسحات سادىربايدىڭ اناسى ورازگۇل اپاي ikerim.kz سايتىنا ەكسكليۋزيۆتى سۇحبات بەرىپ، ەركە ەسماحان مەن ۇلى اسحات اراسىنداعى جايتتى ەگجەي-تەگجەيلى بايانداپ بەردى دەپ حابارلايدى Qamshy.kz.

ەركە ەسماحاننىڭ ەنەسى بولعان ورازگۇل اپاي ۇلى اسحاتتىڭ ەركەگە قول كوتەرۋى مۇمكىن ەمەس دەگەندى جەتكىزدى. ونىڭ ايتۋىنشا، ونىڭ بالالارى ايەلگە ەشقاشان قول كوتەرمەيدى.

"ەكەۋى دە ەلدىڭ الدىندا جۇرگەن ادام. اسحات ەر ازامات قوي. ەركەنىڭ زاتى – ايەل. اسحاتقا سابىر ساقتا دەدىك. ول دا ۇستامدى بولا ءبىلدى. ءوزىنىڭ قانداي ادام ەكەنىن بىلەدى عوي. اركىم ايتقان سوزىنە اللانىڭ الدىندا، ادامنىڭ الدىندا جاۋاپ بەرەدى. زياندى ادەتتەردەن اۋلاق بولسا، ىشىمدىك ىشپەسە، شىلىم شەكپەسە، ارتىق ءجۇرىسى بولماسا ەر ادام ەش ۋاقىتتا ايەلگە قول جۇمسامايدى. تاۋبە دەپ ايتايىن، بالالارىم كەلىنشەكتەرىنە قول كوتەرمەيدى. انا كورگەن، انا سىيلاعان بالا وندايعا بارمايدى. مەن ەشقانداي مۇمكىندىك تە بەرمەيمىن"، - دەگەن ول ەركەنىڭ اسحاتتى «ۇردى» دەپ ايىپتاعان ءسال ارتىق بولعانىن ايتادى."سەبەبى سابىرسىزدىق، قول الىپ جۇگىرىپ، اكىرەڭدەۋ دەگەن مەنىڭ بالالارىما جات نارسە. ول ەلگە سولاي دەپ ايتتى. ءبىراق ەل ءوزى ەلەكتەن وتكىزىپ، ەركەنىڭ كىم، اسحاتتىڭ كىم ەكەنىن اجىراتىپ الدى دەپ ويلايمىن"، - دەگەن ويىن اشىپ ايتتى ورازگۇل اپاي.

سونىمەن بىرگە، ەركەنىڭ بۇرىنعى ەنەسىنىڭ سوزىنە سەنسەك، ەركە ۇيدەن كەتەردە نەكە جۇزىگىن اسحاتقا قاراي لاقتىرىپ جىبەرگەن.

"سول ساتتە بالام «قايتا قوسىلىپ جاتساق تاعارمىن» دەگەن ۇمىتپەن عانا اياق استىنان كوتەرىپ الىپ كەتىپ قالعان. وسى جاعداي وعان «سىيلىقتارىن قايتارىپ الدى» دەپ ايتۋعا نەگىز بولدى. اللا تەك ابىروي بەرسىن. ەركەگە ەش جاماندىق تىلەمەيمىن. قايتا دۇعا، تىلەكتەرىمە قوسىپ وتىرامىن. ويتكەنى ول نەمەرەمدى باعىپ وتىر"، - دەپ اعىنان جارىلدى انا.

اسحاتتىڭ اناسى ەركەنىڭ جامان كەلىن بولماعانىن دا ايتىپ قالدى. ول وتە پىسىق، تاماقتى ءدامدى ازىرلەيتىن كەلىن بولىپتى.

"وتە جاقسى كەلىن بولدى. بىرىنشىدەن، وتە تازا. ەكىنشىدەن، اقكوڭىل. كۇلىپ قارسى الادى. تاعامنىڭ ءتۇر-تۇرىن، وتە ءدامدى ەتىپ ازىرلەيدى. قاشان، قالاي ۇلگەرگەنىن دە بايقاماي قالاتىنبىز. قولى بەرەكەلى. ىستەگەن اسى كوبەيىپ كەتەدى. داستارقاندى جايعاندا جايناتىپ جىبەرەدى. سونداي جايلى كەلىن بولدى"، - دەيدى ول.

ەركەنىڭ ەركەلىگىن اسحاتتىڭ مىنەزى كوتەرە المادى دەيدى اناسى. "سەبەبى، ايەل ادام ەرىنىڭ ايتقان سوزىنە يىلە الماسا، ەرىنە قارسى شىقسا، ونىڭ دا كوڭىلى قالارى بەلگىلى"، - دەيدى شىندىقتى ايتۋعا بەكىنگەن انا.

اناسىنىڭ ايتۋىنشا، اسحات ەركەگە ەشقاشان ونەر كورسەتۋىنە قارسىلىق تانىتپاعان، كەرىسىنشە قولداپ جۇرگەن.

بۇگىندە، اسحات سادىرباي ەركەدەن كەيىن تاعى ءبىر رەت شاڭىراق كوتەرگەن. ونىڭ بۇگىندە زەيىن ەسىمدى ۇلى بار. اسحاتتىڭ اناسى ەكىنشى كەلىنىن ماقتاپ، ونىڭ جاقسى كەلىن ەكەنىن دە اتاپ ءوتتى.