11 قىركۇيەك كۇنى قازاق پوەزياسىنىڭ كورنەكتى وكىلى، مەملەكەتتىك سىيلىقتىڭ لاۋرەاتى، قازاقستاننىڭ حالىق جازۋشىسى حاميت  ەرعالييەۆتىڭ تۋعانىنا 100 جىل تولۋىنا وراي الماتى قالاسى اكىمدىگىنىڭ ۇيىمداستىرۋىمەن سالتاناتتى كەش وتەدى، - دەپ حابارلايدى Qamshy.kz.

سالتاناتتى كەشكە الماتى قالاسىنىڭ باسشىلىعى، زيالى قاۋىم وكىلدەرى مەن اقىننىڭ تۋىستارى قاتىسادى دەپ كۇتىلۋدە.

حاميت ەرعالي (14.10.1916-13.12.1997) گۋريەۆ وبلىسىنىڭ  نوۆوبوگات  اۋىلىندا  (قازىرگى اتىراۋ وبلىسى،  يساتاي اۋدانى،  حاميت  ەرعالي اتىنداعى اۋىل) دۇنيەگە كەلگەن. 1939 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە قابىلداندى. 1940-45 جىلدارى سوۆەت  ارمياسىنىڭ قاتارىندا، ۇلى وتان سوعىسىنىڭ مايداندارىندا بولدى. 1945-50 جىلدارى رەسپۋبليكالىق «سوسياليستىك قازاقستان» (قازىرگى «ەگەمەن  قازاقستان») گازەتىندە ءتىلشى، 1959 جىلعا دەيىن قازاقستان جازۋشىلار وداعىنىڭ پوەزيا سەكسياسىنىڭ،  قازاقتىڭ مەملەكەتتىك كوركەم ادەبيەت باسپاسى ءبولىمىنىڭ مەڭگەرۋشىسى قىزمەتىن اتقارعان. 1959 جىلدان ءومىرىنىڭ اقىرىنا دەيىن ءبىرىڭعاي شىعارماشىلىق جۇمىسپەن اينالىسقان. «اكە سىرى»، «ۇلكەن جولدىڭ ۇستىندە»، «ءبىزدىڭ اۋىلدىڭ قىزى»، «قۇرمانعازى»، «كۇي داستان»، «ورالداعى وتتى ءتۇن»، «اڭىز اتا»،«قىز-حيسسا»، «جىلدار، جىلدار»،  «سۋىت ءجۇرىس»، ت.ب. داستاندارى بار.  اۋدارماشى رەتىندە پۋشكين مەن لەرمونتوۆتىڭ، شەكسپير مەن بايروننىڭ، سوفوكل، ناۋاي، ش.پەتەفي، ماياكوۆسكيي، ر.گامزاتوۆ تۋىندىلارىن قازاق وقىرماندارىنا  جەتكىزدى.  قىرعىزدىڭ «ماناس»، قاراقالپاقتىڭ «قىرىق قىز» اتتى حالىقتىق جىرلارىن قازاقشالادى. ۆ.شەكسپيردىڭ سوننەتتەرىن اۋدارعانى ءۇشىن ول 1996 جىلى بريتانيا كوروليەۆاسىنىڭ العىس حاتىنا يە بولعان.

مەرەيتويلىق كەشتە اقىن شىعارمالارى وقىلىپ، تانىمال ونەر جۇلدىزدارى ءان مەن كۇيدەن شاشۋ شاشادى.

كەش م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا 11 قازان كۇنى ساعات 17.00-دە باستالادى.