تۇركيانىڭ پرەزيدەنتى رەدجەپ تاييپ ەردوعان اقش باسقارۋىنداعى «يسلام مەملەكەتى» تەرروريستيكالىق توپقا قارسى كۇرەس جۇرگىزەتىن كواليسيانى ايىپتادى. "ۋادەلەرىڭدە تۇرمادىڭدار جانە تەرروريستەردى قولدادىڭدار" دەپ كىنا تاقتى، دەپ حابارلايدى Deutsche Welle .
«كواليسيانىڭ كۇشى، وكىنىشكە قاراي، ءدال قازىرگى ساتتە بەرگەن ۋادەلەرىن ۇستانبايدى»، – دەدى ەردوعان انكاراداعى پرەسس-كونفەرەنسيادا.
ونىڭ سوزىنشە، كواليسيا «يگ» جانە كۇردتىك «حالىقتىق ءوزىن-وزى قورعاۋ جاساعىنا» قولداۋ ءبىلدىرىپ وتىر.
«ولار ءبىزدى يگ-عا قولداۋ ءبىلدىرىپ وتىر دەپ ايىپتادى. ال ەندى وزدەرى تەرروريستيكالىق توپتى قولداپ وتىر، ونىڭ ىشىندە يگ، YPG جانە PYD بار. وعان كۇمان جوق. ءبىزدىڭ قولىمىزدا ءسوزىمىزدى ايعاقتايتىن سۋرەتتەر مەن ۆيدەوجازبالار بار»، – دەدى ر. ەردوعان.
