ماسكەۋدەگى «فۋدسيتي» ازىق-تۇلىك بازاسىندا جۇمىس ىستەيتىن وزبەكستاننىڭ تۋماسى الەۋمەتتىك جەلىدە حالىقتىڭ قوشەمەتىنە بولەندى.
بالالار حوسپيسىنا كومەك كورسەتىپ جۇرىتەن يرينا فەسەنكو ءوزىنىڭ Facebook پاراقشاسىندا بالالارعا جاڭا جىلعا ارناپ ابحازدىق مانداريندەردى ساتىپ الۋ ءۇشىن ازىق-تۇلىك بازاسىنا بارعانىن جازدى.
يرينا فەسەنكو ول جەردەن جوعارى ساناتتاعى بىرنەشە جاشىك جەمىس-جيدەكپەن قايتامىن دەپ ويلامادى. يرينانىڭ ازىق-تۇلىك الۋداعى ماقساتىن بىلگەندە قاراپايىم مۇسىلمان جۇمىسشى بىرنەشە جاشىك ازىق-تۇلىكتى بالالارعا سىيلىق رەتىندە بەرىپ جىبەرەدى. وندا قۇرما، قىزاناق ت.ب كوكونىستەر مەن جەمىس-جيدەكتەر بار.
«بۇگىن كۇن سۋىق بولدى. جىلىنۋ ءۇشىن ۇيگە اسىعىپ بارامىن. جاڭى جىلعا دەيىن از قالدى. ماسكەۋدىڭ بالالار حوسپيسىندا ءوتىپ جاتقان اكسياعا ءالى ماندارين الماعانىم ەسىمە ءتۇسىپ (مەيرام ەكەنىن ءبىلدىرۋ ءۇشىن ماندارين نەمەسە قانداي دا ءبىر ءتاتتى الىپ كەلۋ كەرەك) كولىكتى بۇرىپ «فۋتسيتيگە» قاراي بەتتەدىم. ەكىنشى قاتاردا ءمانداريننىڭ ءيىسى اڭقىپ تۇر. اربالاردىڭ اراسىنان ءوتىپ، ابحازدىق ءمانداريندى ىزدەپ كەلەمىن. تۇرىك، سەربتىك، سوڭىنا قاراي ابحازيا دەگەن جازۋدى كوردىم. ءدامىن كوردىم...جوق، ول ەمەس. «اناممەن انت ەتەمىن، ابحازيا» دەيدى ساتۋشى. بىلاي الداۋدىڭ قاجەتى نە؟ كۇنا عوي بۇل...جانىم جابىرقاپ تۇر. ءۇش جاشىك سەربتىڭ ءدامدى ماندارينىن ساتىپ الدىم. ونىڭ بارلىعىن تاجىكتىڭ ارباسىنا سالىپ، شىعىپ بارامىز. شىعا بەرىستە وزبەك قاۋىنىن كورىپ قالدىم. مەرەكەلىك داستارحانعا سۇرانىپ تۇرعانداي. ساتۋشى قاۋىندى ولشەپ تۇرىپ «وزىڭىزگە مانداريندى ارتىعىمەن ساتىپ العان جوقسىز با؟» دەپ سۇرادى. بۇل بالالار ۇيىنە جاڭا جىلعا ارنالعانىن ايتتىم. ورىسشا ناشار سويلەيتىن ساتۋشى «قايدا؟» دەپ قايتا سۇرادى. بىردەن قۇرما سالىنعان جاشىكتى الىپ مىنانى مەنىڭ اتىمنان بالالارعا بەرەرسىڭ دەدى» دەپ جازادى يرينا فەسەنكو.
ەر ادامنىڭ بۇل ارەكەتىنە ءتانتى بولعان يرينا مۇنداي جومارت سىيدان باس تارتا باستادى. ساتۋشى ەشتەڭەگە قاراماي بالالارعا ءوز سىيىن بەرەتىنىن كەسىپ ايتتى.
«بۇل سىيىڭىزعا قالاي ريزاشىلىعىمدى بىلدىرە الامىن» دەگەن ساۋالعا «اللا، وماردى ماراپاتتا» دەگەن سويلەمدى ايتۋدى سۇرادى.
«سەزىمدەرىم بىر-بىرىمەن شاتاسىپ كەتتى...الايىن با، الدە المايىن با...قالايشا تەگىن...وسى كەزدە ساتۋشى ويىمدى ءبولىپ جىبەردى، ولاردىڭ انالارى جوق پا؟ انالارى بار ءبىراق بۇل بالالار اۋراحانادا جاتىر. كوبىسى جازىلمايتىن اۋرۋعا شالدىققان. ءبىز ولارعا كىشىگىرىم مەيرام ۇيىمداستىرىپ بەرگىمىز كەلەدى. سول كەزدە ەر ادام ءبىر جاشىك وزبەك قىزاناقتارىن الىپ مەنىڭ ارباما سالدى. بۇل دا بالالارعا. جوق...كەرەك ەمەس...ونى جەۋگە بولمايتىن شىعار (ىشتەي بۇل جىگىتتى قالاي ريزاشىلىعىمدى بىلدىرەتىنىمدى تۇسىبەيمىن)...بولادى..مەن بىلەمىن...بولادى دەيدى ول. تەك بۇل سىيىمدى بەرگەندە «اللا، وماردى ماراپاتتا» دەپ ايتساڭىز بولدى» دەپ قورىتىندىلادى يرينا فەسەنكو.
دەرەك كوز: nuz.uz
