قىرعىزستان پرەزيدەنتى وسى ەلدىڭ كونستيتۋسياسىنا ەنگىزىلگەن وزگەرتۋلەرگە قول قويدى.

قىرعىزستان پرەزيدەنتى اكىمشىلىگىنىڭ باسپا ءسوز ورتالىعى بيىلعى جىلعى 11ء-شى جەلتوقسان كۇنگى رەفەرەندۋمنىڭ ناتيجەسىندە حالىق تاراپىنان راستالعان وسى ەلدىڭ كونستيتۋسياسىنا ەنگىزىلگەن وزگەرتۋلەردىڭ 2017 جىلدىڭ 15ء-شى قاڭتاردان باستاپ كۇشىنە ەنگىزىلەتىنىن حابارلادى. وسى زاڭدى ورىنداۋدىڭ ماقساتى وزگەرتۋلەر ەنگىزۋ، تاۋەلسىزدىك پەن ەگەمەندىكتى نىعايتۋ، پارلامەنتتىڭ بيلىگىن ۇلعايتۋ، زاڭ شىعارۋشى جانە اتقارۋشى بيلىك اراسىنداعى ىنتىماقتاستىق قاعيداسىن ايقىنداۋ بولىپ تابىلادى.

قىرعىزستان پرەزيدەنتى وسى زاڭ كۇشىنە ەنگىزىلگەننەن كەيىن 14 كۇننىڭ ىشىندە قىرعىزستان كونستيتۋسياسىنىڭ رەسمي ءماتىنىن رەفەرەندۋم وتكەننەن كەيىن ەنگىزىلگەن وزگەرتۋلەردى باسشىلىققا الىپ، حالىققا ۇسىنۋى ءتيىس.

ايتا كەتسەك، قىرعىزستان ورتالىق سايلاۋ جانە رەفەرەندۋم وتكىزۋ جونىندەگى كوميسسياسىنىڭ الدىن الا مالىمەتتەرى بويىنشا، جەلتوقساننىڭ 11ء-ى كۇنى وتكەن رەفەرەندۋمگە قاتىسقان سايلاۋشىلاردىڭ 80 پايىزعا جۋىعى كونستيتۋسياعا وزگەرتۋلەر ەنگىزۋدى قولداعان.

رەفەرەندۋمگە بارلىعى 30-دان استام وزگەرتۋلەر داۋىسقا قويىلعان ەدى. رەفەرەندۋم ناتيجەسىنە ساي، قىرعىزستاندا، ماسەلەن، ۇكىمەت جەتەكشىسىنىڭ قۇزىرەتى كەڭەيتىلەدى. ول مينيسترلەردى قىزمەتكە تاعايىنداۋ جانە بوساتۋ ماسەلەسىن پرەزيدەنت پەن جەرگىلىكتى كەڭەشتەردىڭ ماقۇلداۋىنسىز جەكە ءوزى شەشەتىن بولادى. سونىمەن بىرگە ول بيۋدجەتتىڭ شىعىس بولىگىن ۇلعايتاتىن زاڭ جوبالارىن بوگەۋ قۇقىعىنا يە بولادى. بۇعان قوسا پرەمەر-مينيستر مەن ونىڭ ورىنباسارلارى وتستاۆكاعا كەتكەننەن كەيىن پارلامەنتكە ورالىپ، دەپۋتاتتىق مانداتتارىن ساقتاپ قالماق.

قىرعىزستان پرەزيدەنتىنە كونستيتۋسيالىق سوت قۇرامىنا كانديداتتار ۇسىنۋعا جانە، ەگەر پارلامەنتتىڭ ۇشتەن ەكىسى قولداۋ بىلدىرسە، سۋديالاردى قىزمەتتەن الۋعا قۇقىق بەرىلەدى.

كونستيتۋسياعا ەنگىزۋ ۇسىنىلعان وزگەرتۋلەر اراسىندا ءبىر جىنىستىلار اراسىنداعى نەكەگە تىيىم سالۋ جانە حالىقارالىق نورمالاردىڭ ۇلتتىق زاڭنان باسىمدىعىن جويۋ دا بار.