جويقىن جارىلىستان سوڭ جالما-جان قازاندىقتاردى تۇگەندەي باستاعان شەنەۋنىكتەر تاعى وسىنشاما تۇرعىن ءۇيدىڭ جىلۋ جۇيەسى جەرتولەسىندە دەپ شىندىعىن ايتتى دەپ حابارلايدى ktk.kz. ال جىلىنا جەتى اي تىنباي جاناتىن قازاندىقتان ءقاۋىپ ۇلكەن. بۇعان دەيىن ەشكىمنىڭ قاپەرىنە دە كىرىپ-شىقپاعان پەشتەر 9 ادامنىڭ ولىمىنەن كەيىن جاپپاي تەكسەرىلە باستادى. ءتىپتى جەرگىلىكتى بيلىك كىنالىنى تاۋىپ تا قويعان سياقتى. بار جاۋاپكەرشىلىك ارتىلعان وت جاعۋشى ءقازىر تەرگەۋشىلەر الدىندا جاۋاپ بەرۋدە. قىس تۇسسە بولعانى ءوز قوتىرىن ءوزى قاسىپ ۇيرەنگەن جۇرت بولسا، ۇيلەردە قالۋعا ۇرەيلەنىپ وتىر. 

بۇل ءتۇنى بۇكىل شاحاندىقتار جاڭا جىلدى تويلاۋدى كىلت توقتاتقان. ءالى دە تۇككە تۇسىنبەگەن جۇرت ءتورتىنشى ۇيدە تۇراتىن تۋىستارىن ءۇيىندىنىڭ اراسىنان ىزدەۋمەن بولدى.قۇتقارۋ جۇمىستارىنا قاراعاندى وبلىسىنىڭ بۇكىل كۇش قۇرىلىمى جۇمىلدىرىلعان. ودان بولەك تاعى 300-گە تارتا ەرىكتى ءۇيىندىنى ارشىپ ءجۇر.

-جانتۇرشىگەرلىك جارىلىستىڭ سەبەبى تەك ءبىر تاۋلىكتەن سوڭ بەلگىلى بولدى. سويتسە، جەرتولەدە ورنالاسقان دەربەس جىلۋ قازاندىعى قىسىمعا شىداماي جارىلعان ەكەن. سالدارىنان كوپقاباتتى ءۇيدىڭ ءبىر بولىگى جەرمەن-جەكسەن بولدى.  

دەسە دە، 9 ادامنىڭ قازا تاپقانىنا قاراماستان، بۇل جارىلىس ءۇشىن ناعىز كىنالىلەردىڭ تابىلمايتىن ءتۇرى بار. ويتكەنى، سۋ مەن جىلۋعا جاۋاپتى كوممۋنالدىق قىزمەتتىڭ بارىنا قاراماستان، قاراعاندىلىق شەنەۋنىكتەر بولعان وقيعاعا تۇرعىنداردىڭ تەك وزدەرى عانا جاۋاپتى دەپ وتىر.     

سەرجان ايماقوۆ، شاحتينسك قالاسىنىڭ اكىمى:

-60 پاتەر ءبارى دە جەكەمەنشىك. وزدەرى شەشەدى. كەيبىر ۇيلەر پەشتەرمەن وتىر. كەيبىرەۋلەر سىرتىنا قازاندىق سالىپ الدى. كەيبىر ۇيلەر وزدەرىنە جەرتولەگە قازاندىق سالدى. جەكەمەنشىك بولعاننان كەيىن قاۋىپسىزدىككە وزدەرى جاۋاپتى.

سويتسە، تەك بۇل ءۇي عانا ەمەس، بۇكىل شاحان كەنتى جىلۋعا جارىماعان ەكەن. قىسى ىزعارلى وڭىردە تۇرعىندار ءوز قوتىرىن ءوزى قاسىپ ۇيرەنگەن. ءبىرى كومىر جاعىپ جىلىنسا، ەندى ءبىرى وسىلاي ءۇيىنىڭ استىنان پەش تۇرعىزىپ العان ەكەن. ال شەنەۋنىكتەر ون جىل بۇرىن ورتالىقتاندىرىلعان جىلىتۋ جۇيەسىن سالماق بولعانىن ايتىپ اقتالۋدا. الايدا وعان ۇكىمەتتەگىلەر رۇقسات بەرمەپتى.  

سەرجان ايماقوۆ، شاحتينسك قالاسىنىڭ اكىمى

- بيۋدجەتتىك ۇسىنىستارىمىزدى ءبارىن بەرگەن بولاتىنبىز. ونى وبلىستىق كوممۋنالدىق باسقارماسى بار،  مينيسترلىگى بار ءبارى  بىلەدى. ەندى قيىن جىلدارى قاراجات بولىنگەن جوق.

ال 5 قاباتتى ءۇيدىڭ ساۋ تامتىعىن قالدىرماعان جىلىتۋ قازاندىعى ءالى 18 ۇيدە بار. ءبارى دە جەرتولەدە ورنالاسقان. سونىڭ كەسىرىنەن جەرلەستەرىن جەر قويناۋىنا تاپسىرعان جۇرت ەندى وزدەرىن قويارعا جەر تاپپاي وتىر.  

ليديا پريماك، شاحان كەنتىنىڭ تۇرعىنى:

-ال ەگەر ءبىزدىڭ دە قازاندىق جارىلىپ كەتسە شە؟   تۇرعىندار تۇگەلدەي دەرلىك جىلۋعا جارىماعان سوڭ گاز باللون قوسىپ وتىر. ءبىر كۇنى ءبىزدىڭ دە شاتىرىمىز توبەمىزگە تۇسسە قايتپەكپىز؟ ءولىم-جىتىم كوبەيمەي تۇرعاندا ماسەلەنى شەشىپ بەرسىن!

ليديا پريماكتىڭ ايتۋىنشا، جارىلىس تەك جىلىتۋ قازاندىعىنان بولماعان. وعان گاز باللونداردىڭ دا اسەرى بار. ويتكەنى، جىلۋعا جارىماعان شاحاندىقتار تەك پروپان تۇتىنادى ەكەن. ال كوگىلدىر وتىن قوسىلماعاندىقتان، بيلىكتەگىلەر دە وعان كوز جۇما قاراعان. ەسەسىنە، توعىز ادامنىڭ ءومىرىن جالماعان جارىلىس ءۇشىن قازاندىقتىڭ كۇتۋشىسى تەرگەلىپ جاتىر.