شەنەۋنىكتەردىڭ ءبىرى وياتقىش قويسا، ەندى ءبىرى وبلىستىق اكىمنىڭ تاپسىرماسىن ەلەمەيدى دەپ حابارلايدى ratel.kz.

شىعىس قازاقستاننىڭ وبلىستىق اكىمدىگىندە وتكەن جينالىس بارىسىندا كىمنىڭ قاي ۋاقىتقا وياتقىشتى قوياتىنى، كىم باسشىلىقتىڭ تاپسىرماسىن ورىندامايتىنى جانە وسكەمەننىڭ جاڭا ورتالىعى قايدا بولاتىنى بەلگىلى بولدى.

اكىمدىك وتىرىسىندا گادجەتتىڭ قاجەتى نە؟

جينالىستا سالماقتى ماسەلەلەر قارالدى. شقو وتكەن جىلداعى الەۋمەتتىك-ەكونوميكالىق دامۋى، سالىنعان تۇرعىن ءۇي مەن الەۋمەتتىك نىساندار، جەرگىلىكتى سپورتشىلاردىڭ الداعى وتەتىن ۋنيۆەرسيادا مەن ازياداعا دايىندىعى ءسوز بولدى.

دەسەك تە، شقو اكىمى دانيال احمەتوۆتىڭ توراعالىعىمەن وتكەن جينالىستاعى شەنەۋنىكتەردىڭ ويى ۇنەمى باسقاعا ءبولىنىپ وتىردى. ونىڭ ىشىندە وبلىس اكىمىنىڭ ورىنباسارى سەرىك اقتانوۆتىڭ تەلەفونى بىرنەشە مارتە شىرىلداعانى دا بار.  سەرىك اقتانوۆ (فوتودا) وياتقىش قويعانىن ايتىپ، اقتالدى.

«ەگەر مەملەكەتتىك قىزمەتكەرلەردىڭ وياتقىشى تاڭعى ون ءبىر جارىمدا شىرىلداسا، بۇل كورسەتكىش» دەدى دانيال احمەتوۆ.

وسىدان كەيىن جينالىس تەلەفوننىڭ شىرىلىنسىز ءوتتى. سوعان قاراعاندا باسقالارى تەلەفوندارىن دىبىسسىز رەجيمگە قويىپ ۇلگەرگەن بولۋى كەرەك. تىكەلەي تاپسىرما ورىندالماعان جاعدايدا ءبىرقاتار شەنەۋنىك جازالاناتىنى بەلگىلى بولدى.

قۇرىلىس، ساۋلەت باسشىلارى جانە  وسكەمەننىڭ ەكى ءىرى قالالارىنىڭ اكىمدەرى سىنعا الىندى.

«2016 جىلدىڭ ەكىنشى جارتىسىندا نەلىكتەن بارلىق كوپ قاباتتى ۇيلەردىڭ قۇرىلىس جوباسىندا ءبىر پاتەرگە ءبىر جارىم تۇراق قاراستىرىپ، كولىك جۇرەتىن جەردى كەڭەيتۋ تۋرالى مەنىڭ تاپسىرمام ورىندالماعان؟ مەن تاپسىرما بەرسەم، سىزدەر ونى ورىنداماۋدىڭ سەبەپتەرىن ىزدەيسىزدەر. مەن بۇل تاپسىرمانى 2015 جىلدىڭ تامىز ايىندا بەرگەنمىن. ەگەر تاعى دا ءىس ناتيجەسىز قالسا وسكەمەن اكىمى ەرلان ايمۇقاشيەۆ پەن سەمەي اكىمى ەرماك ءسالىموۆ جاپا شەگەدى» دەپ وبلىس اكىم ەسكەرتۋ جاسادى.

بۇعان دەيىن دە ءبىرقاتار شەنەۋنىكتەر باسشىلىق تاپسىرماسىن ورىنداماي، تەكسەرىلمەگەن اقپارات بەرىپ، كەيبىر دايەكتەردى جاسىرىپ وتىرعان. كەيبىرى وتستاۆكاعا كەتكەن. بۇرىنعى مەملەكەتتىك قىزمەتكەرلەردىڭ تاعدىرىن قايتالاماۋى ءۇشىن وسكەمەن قالاسىنىڭ اكىمى ەرلان ايمۇقاشيەۆ شۇعىل تۇردە كولىك قامسىزداندىرۋىنىڭ سحەماسىن جاساپ، وسى سەكىلدى قالانىڭ باسقا دا ماسەلەلەرىن شەشۋى قاجەت.