اقش-تىڭ دجوردجيا شتاتىنداعى ارمسترونگ مەملەكەتتىك ۋنيۆەرسيتەتى بەلگىلى OutKast توبىنىڭ شىعارماشىلىعىنا تۇتاس ءبىر كۋرس ارناماقشى دەپ حابارلايدى massaget.kz. OutKast — دجي-فانك پەن كلاسسيكالىق سوۋل جانرلارىنا نەگىزدەلگەن وڭتۇستىك حيپ-حوپ باعىتىنداعى رەپ-دۋەت. رەپەرلەر – اتلانتتىق حيپ-حوپ مەكتەبىنىڭ جولىن جالعاۋشىلار. 6 رەت "گرەممي" ماراپاتىنىڭ لاۋرەاتى اتانعان. Outkast توبى وڭتۇستىكتىڭ اگرەسسيۆتى رەپ جانرىنا وپتيميستىك ءۇن الىپ كەلگەن ەرەكشە توپ. 2014 جىلعا دەيىنگى ەسەپ بويىنشا، دۋەت 25 ميلليوننان استام البوم ساتقان. سونداي-اق، NME، Pitchfork، Rolling Stone مەن Spin سىندى بەدەلدى مۋزىكالىق باسىلىمدار توپتىڭ Aquemini جانە Stankonia اتالاتىن البومدارىن ۇزدىك دەپ تانىعان. جوعارىدا اتاپ وتىلگەن يدەيانىڭ اۆتورى افريكا-امەريكالىق ادەبيەت پروفەسسورى رەگينا برەيدلي بولىپ وتىر. برەيدلي حانىمنىڭ ماقساتى –  OutKast اتالاتىن حيپ-حوپ باعىتىنداعى توپتىڭ شىعارماشىلىعى ارقىلى رەپ جانرى ساياسي پىكىر ءبىلدىرۋ قۇرالى بولا الاتىنىن كورسەتۋ. راسىندا دا، OutKast توبىنىڭ نەگىزىن قالاۋشى اندرە بەندجامين (Andre 3000) جانە ەنتۆان پاتتون(Big Boi) ەسىمدى رەپەرلەر شتاتتاردا مەكەن ەتەتىن قارا ناسىلدىلەردىڭ ومىرىندە كەزدەسەتىن كەدەيلىك، ساۋاتسىزدىق جانە ت.ب. ماسەلەلەردى قوزعايدى. ارمسترونگ مەملەكەتتىك ۋنيۆەرسيتەتى اقش-تىڭ وڭتۇستىگىندەگى دجوردجيا شتاتىندا ورنالاسقان. بۇل جەردە ناسىلدىك تەڭسىزدىك بەلەڭ العان. وعان مىسال: تالانتتى مۋزىكانت رەي چارلز 1961 جىلى ءوزىنىڭ كونسەرتىنە شىعاردا دجوردجيا شتاتىنىڭ ءبىر قارا ءناسىلدى ستۋدەنتىنەن حابارلاما الادى. وندا ۋنيۆەرسيتەت ىشىندەگى شارا كەزىندە اق ناسىلدىلەرگە عانا ءان سالۋعا رۇقسات ەتىلىپ، قارا ناسىلدىلەرگە تەك تاماشالاۋعا تۋرا كەلەتىنى ايتىلىپتى. ونى ەستىگەن رەي كونسەرتىن كەيىنگە قالدىرادى، ويتكەنى ول ناسىلدىك سەگرەگاسياعا ءارقاشان قارسى بولدى.