كوكتەم مەرەكەسىن قىتايلىقتار وتباسىمەن بىرگە قارسى الۋ مىزعىماس داستۇرگە اينالعان دەپ حابارلايدى 24.kz. ءدال وسى ۋاقىتتا اتا-انالارى مەن تۋىسقاندارى جاستاردى سۇراقتىڭ استىنا الىپ، تەزىرەك وتباسىلى بولۋىن تىلەيدى. ال بۇل ەلدە تۇرمىس قۇرماعان قىزدار سانى جىلدان جىلعا ارتىپ كەلەدى. بويجەتكەندەر سوڭعى جىلدارى تۋعان-تۋىستىڭ سوزىنەن قاشىپ، مەرەكە كۇندەرى وزىنە سەرىك بولاتىن جىگىتتەردى جالداپ الاتىن بولعان. جالدانبالى «كۇيەۋ بالالار» ءتۇرلى الەۋمەتتىك جەلىدە وزدەرىن جارنامالاپ الەك. جەكە دەرەككە بويىن، سالماعىن، جۇمىس ورنىن كورسەتىپ، ءتىپتى قىزدىڭ اتا-اناسى ۇيلەنۋ تۋرالى قانداي سۇراق قويسا دا، جاۋاپ بەرۋگە دايىن ەكەندەرىن اشىق جازادى. چجاۋ يۋبو كوكتەم مەرەكەسىندە ۇيىنە قايتپاي، بەيجىڭدە قالدى. بويجەتكەندەر تاراپىنان سۇرانىس بار كەزدە جالدانىپ، قوسىمشا تابىسقا كەنەلسەم دەيدى. ءشاي ساتىپ، كۇنىن كورىپ جۇرگەن بوزبالانىڭ ءقازىر تەلەفونىنا تىنىم جوق. بىزبەن سۇحباتتاسۋ كەزىندە بىرنەشە قىز حابارلاسىپ ۇلگەردى.

چجاۋ يۋبو، بەيجىڭ قالاسىنىڭ تۇرعىنى: -     

 – ۇيگە قايتقان سوڭ، ءبىر جىلدىق جاڭالىقتارىمەن ءبولىسۋ كەرەك قوي. ال ۇلكەندەر جاعى قاشانعى وسىلاي جۇرەسىڭ، تۇرمىس قۇراتىن ۋاقىتىڭ جەتتى دەپ جان-جاقتان پسيحولوگيالىق قىسىم جاسايدى. وسى سۇراقتان جەڭىل قۇتىلۋ ءۇشىن بويجەتكەندەر ۋاقىتشا «جىگىت» جالداۋعا ءماجبۇر.

قىتايدىڭ QQ الەۋمەتتىك جەلىسىندە جالدامالى «بويفرەند»ء-تى ءبىر تاۋلىككە جالعا الۋ 600-دەن 1000 يۋانعا باعالانسا، مەرەكە كۇندەرى 1000-1500 يۋانعا دەيىن قىمباتتايدى. ارى-بەرى جۇرگەن جولاقىسى مەن باسقا دا شىعىندى قىز كوتەرەدى. ويى مەن بويى بويجەتكەن تالابىنا ساي بولسا، كەلىسىمشارتقا وتىرادى. تۋىستارى سەزىكتەنىپ قالماس ءۇشىن ەرتەرەك كەزدەسىپ، نە ايتاتىندارىن اقىلداسىپ الادى.

لي سۋەيxۋا، بەيجىڭ قالاسىنىڭ تۇرعىنى:    

– مەنىڭ ويىمشا باسى بوس جاستارعا تاماشا مۇمكىندىك. زامان تالابىنان تۋىنداعان كاسىپتىڭ جاڭا ءتۇرى سياقتى. جاسى كەلگەن قىزدار ۇيىنە بارعاندا تۋىستارى تاراپىنان جەكە ومىرىنە قاتىستى ىڭعايسىز اڭگىمەدەن قۇتىلۋ ءۇشىن وسىنداي قادامعا بارادى. ادەپتى بۇزباي، زاڭ شەڭبەرىنەن شىعىپ كەتپەسە، مۇنىڭ ەش ابەستىگى جوق.

ۆان تيان، بەيجىڭ قالاسىنىڭ تۇرعىنى:        

– ءوزىن ۋاقىتشا جالعا بەرىپ، وزگەنى الداۋعا قارسىمىن. كەز كەلگەن اتا-انا بالاسىن تەزىرەك وتباسىلى بولعانىن قالايدى. الايدا اتا-انانى بۇلاي الداۋ دۇرىس ەمەس. China news جازۋى بويىنشا، ادەتتە قايىن جۇرتىمەن تانىسۋعا بارعان «كۇيەۋ بالا» بولەك بولمەدە جاتادى. بۇل كەلىسىم بويىنشا ءرول ويناپ جۇرگەن جاستارعا وتە ىڭعايلى. جىگىتتەردى ۋاقىتتشا سەرىك ەتىپ جالعا الۋ زاڭعا قايشى ەمەس. ءبىراق زاڭگەرلەر بۇل ارەكەتتىڭ سوڭى كەلەڭسىز جاعدايعا اكەلۋى مۇمكىن ەكەنىن ەسكەرتەدى. ال ونى مۇنداي جاعدايدا دالەلدەۋ قيىنعا سوعادى.

اۆتور: نۇربەك بەكەن