نۇرلان نوعايەۆ حالىقپەن تۇسىنىسە المايتىن باسشىلاردى ايىپتايتىنىن ايتتى. بۇل تۋرالى قىزىلقوعا اۋدانىندا وتكىزگەن كوشپەلى كەڭەسىندە بەلگىلى بولدى.
جيىندا وبلىستاعى ۆەتەريناريا، اۋىل شارۋاشىلىعى سالاسىنىڭ حال جاعدايى تالقىلانعان.
نۇرلان نوعايەۆ 2016 جىلى كەلگەندە جەرگىلىكتى اكىمگە بەرگەن 22 تاپسىرماسىنىڭ قالاي ورىندالعانىن دا سۇرادى. اۋدان اكىمىنىڭ ايتۋىنشا، تاپسىرمالاردىڭ 10-ى ورىندالىپ، 8ء-ى ورىندالىپ جاتىر، قالعاندارى شەشىمىن تاپپپاعان.
كەڭەستە ايماقتاعى اۋىلشارۋاشىلىق سالاسىنىڭ جاعدايى تۋرالى سايكەس باسقارمانىڭ باسشىسى سىرىم رىسقالييەۆ باياندادى.
ونىڭ ايتۋىنشا، وبلىستىڭ بۇل سالاداعى دامۋ دەڭگەيى جاقسى. ايماقتاعى اۋىلشارۋاشىلىق ونىمدەرىنىڭ كولەمى ارتقان. بۇل كورسەتكىش الدىڭعى جىلعىدان 4 پايىزعا كوبەيىپ 61 ميللياردقا جەتىپ وتىر. ونىڭ ىشىندە مال شارۋاشىلىعى ونىمدەرى 2 پايىزعا، ەگىن شارۋاشىلىعى ونىمدەرى 6 پايىزعا جوعارىلاعان.
اگروونەركاسىپ كەشەنىن سۋبسيديالاۋ ءۇشىن 2،7 ميلليارد تەڭگە بولىنگەنى دە بەلگىلى بولدى. سونىڭ ارقاسىندا وبلىستا، ماسەلەن، قوي مەن ەشكىنىڭ سانى 6000 باسقا ارتىپ، 538 مىڭعا جەتكەنى ايتىلدى. بۇل كورسەتكىش الدىڭعى جىلعى كورسەتكىشتەن 1 جارىم پايىزعا ارتىق.
ال “التىن اسىق” باعدارلاماسى اياسىندا وبلىس حالقى 5 مىڭعا جۋىق قوي ساتىپ الىپ، ايماق جوسپاردى 30 پايىزعا ارتىق ورىنداپ وتىر. ايتە دە، بۇل كورسەتكىش جوسپاردى 2 ەسەدەن ارتىق ورىنداعان جىلىوي، قۇرمانعازى اۋداندارىنداعى جۇمىستىڭ سەبەبىنەن وسكەن. ال كەڭەس ءوتىپ وتىرعان قىزىلقوعا اۋدانىنىڭ بۇل باعدارلاما جوسپارىن ءتيىستى دەڭگەيگە ورىنداي الماعانى بەلگىلى بولدى. اۋدان شارۋالارى 2016 جىلى 1000 باس قوي الۋى كەرەك بولعان، الايدا جەرگىلىكتى باسشىلىق بۇل تاپسىرمانىڭ ۇدەسىنەن شىعا الماي، جوسپاردىڭ جارتىسىن دا ورىنداماعان.
ايماق باسشىسى نۇرلان نوعايەۆ بۇل كەمشىلىك ءۇشىن جەرگىلىكتى باسشى ماقسوت مۇقانوۆتى سىننىڭ استىنا الدى.
“ايماقتا اۋىلشارۋاشىلىق قارقىندى دامىپ كەلە جاتىر. مال سانى دا، ودان وندىرىلگەن ونىمدەردىڭ كولەمى دە جىلدان جىلعا ارتىپ وتىر. ءبىراق بۇعان ۇلەس قوسىپ، سەبەپكەر بولىپ وتىرعان اۋداندار ساناۋلى. كەيبىرى جەتىستىككە ورتاقتاسىپ قانا ءجۇر. تاپسىرما ءار اۋداننىڭ ەرەكشەلىگىنە ساي بىرىنە كوبىرەك، بىرىنە ازىراق بەرىلەدى. سوندىقتان، مىنا اۋداننىڭ جاعدايى بىزدەن گورى جاقسىراق دەگەن سىلتاۋ بۇل جەردە جۇرمەيدى”، - دەدى ايماق باسشىسى.
وبلىس اكىمى، بۇل جاعدايعا سەبەپ بولىپ وتىرعان نەگىزگى فاكتور رەتىندە تۇرعىنداردىڭ مەملەكەت جاساپ جاتقان كومەكتەن بەيحابارلىعى دەدى.
“حالىق باعدارلامالاردىڭ كوبىنەن حابارسىز. بىلمەيدى. اكىمدىكتەر بۇل باعىتتاعى جۇمىستى ۇدەتۋى كەرەك. ءار كاسىپكەردىڭ سوڭىنان جۇگىرىپ، مانىنا ەكشى، انانى ءوسىرشى دەپ جالىنىپ جۇرمەي، جالپى ءتۇسىندىرۋ كەرەك. ەگەر حالىق “التىن اسىق”، “سىباعا”، “قۇلان” سەكىلدى باعدارلامالاردىڭ بايىبىنا بارىپ، ارتىقشىلىعىن سەزىنەتىن بولسا، وزدەرى سوڭدارىڭىزدان قالماي، سۋبسيديا سۇراپ جۇگىرىپ جۇرەدى”، - دەدى ايماق باسشىسى.
ايتا كەتەلىك، بىلتىر قىزىلقوعا اۋدانىنداعى “جاسقايرات” كومپانياسىندا سۋىقتان 635 قوزى ولگەن ەدى. وبلىس اكىمى بۇعان جەرگىلىكتى اكىمدىكتىڭ، ۆەتەريناريا باسقارماسىنىڭ جۇمىسىنداعى السىزدىكتەر سەبەپ ەكەنىن ايتتى.
