بۇگىن الماتىدا XXVIII بۇكىلالەمدىك ۋنيۆەرسيادا باستالدى.

28 قاڭتار كۇنى ۇلىبريتانيا، قازاقستان، كانادا، جۇڭگو، سلوۆاكيا، لاتۆيا مەن جاپونيانىڭ حوككەيشىلەرى مەدالعا تالاسادى.

ەرلەر كومانداسى حالىق ارەنادا، ال ايەلدەر - بالۋان شولاق اتىنداعى سپورت سارايىندا ب ا ق سىنايدى.

شايبالى حوككەي - ەرلەر

12:30 - سلوۆاكيا - ۇلىبريتانيا، توپتىق كەزەڭ.

16:00 - جاپونيا - لاتۆيا، توپتىق كەزەڭ.

19:30 - قازاقستان - جۇڭگو، توپتىق كەزەڭ.

شايبالى حوككەي - ايەلدەر

16:30 - كانادا - جۇڭگو، توپتىق كەزەڭ.

20:00 - قازاقستان - ۇلىبريتانيا، توپتىق كەزەڭ. ايتا كەتەيىك، «حالىق ارەناداعى» بيلەتتىڭ قۇنى 500-700 تەڭگەنى، ال بالۋان شولاق اتىنداعى سپورت سارايىندا بيلەتتىڭ باعاسى - 300-500 تەڭگەنى قۇرايدى.

الماتىدا وتەتىن 28ء-شى بۇكىلالەمدىك ۋنيۆەرسيادانىڭ اشىلۋ سالتاناتى ەرتەڭ - 29 قاڭتار كۇنى وتەدى.

ۋنيۆەرسيادانىڭ جالپى جارىس كەستەسى سۋرەتتەگىدەي:

وقىرماندى ۋنيۆەرسيادا ويىندارى تۋرالى اقپاراتتاندىراتىن بولساق، ستۋدەنتتىك سپورت تاريحى 1905 جىلدان باستالادى. وسى جىلى اقش-تا ستۋدەنت جاستاردىڭ العاشقى حالىقارالىق جارىسى ءوتتى. ءبىرىنشى دۇنيەجۇزىلىك ستۋدەنتتىك ويىندار 1923 جىلى پاريجدە ۇيىمداستىرىلدى. الايدا، ۋنيۆەرسيادا دەگەن اتاۋ العان العاشقى سپورت جارىسى 1959 جىلى يتاليانىڭ تۋرين قالاسىندا ءوتتى. سودان بەرگى كەزەڭدە ۋنيۆەرسيادا الەمدەگى ەڭ ايشىقتى حالىقارالىق بۇقارالىق سپورت جانە مادەني وقيعالاردىڭ بىرىنە اينالدى. ۋنيۆەرسيادانىڭ ءبىر ماقساتى – سپورتتى ءبىلىم بەرۋ جۇيەسىنىڭ ماڭىزدى ەلەمەنتتەرىنىڭ ءبىرى رەتىندە ىلگەرىلەتۋ.

ۋنيۆەرسيادانى الماتىدا وتكىزۋ تۋرالى رەسمي شەشىم 2011 جىلعى 29 قاراشادا بريۋسسەلدە حالىقارالىق ۋنيۆەرسيتەتتىك سپورت فەدەراسياسىندا (FISU) وتكەن داۋىس بەرۋ ناتيجەسىندە قابىلداندى. وسىلايشا، الماتى بۇرىنعى كەڭەستىك كەڭىستىك ەلدەرىنىڭ ىشىندە ءبىرىنشى بولىپ، 2017 جىلى وتەتىن XXVIII قىسقى ۋنيۆەرسيادانىڭ استاناسىنا اينالدى. بۇعان دەيىن 1973 جىلى ماسكەۋ جانە 2013 جىلى قازان قالاسى جاستاردىڭ تەك جازعى سپورت ويىندارىن قابىلداعان بولاتىن. ۋنيۆەرسيادا تۋىن الماتى قالاسىنا بەرۋ سالتاناتتى ءراسىمى 2015 جىلعى 15 اقپاندا يسپانيانىڭ گرانادا قالاسىندا ءوتتى.

الماتىدا وتەتىن 2017 جىلعى دۇنيەجۇزىلىك قىسقى ۋنيۆەرسيادانىڭ تۇمارى رەتىندە سۇڭقار تاڭدالدى. تۇماردى ۇسىنۋشىلاردىڭ پىكىرىنشە، سۇڭقار جىلدامدىقتى، جەڭىلدىكتى، كۇش-قۋات پەن جەڭىسكە دەگەن قۇلشىنىستى بەينەلەيدى. لوگوتيپ ايقىن كورىنەتىن ديناميكالىق ءپىشىنى بار سۇڭقار قاناتى تۇرىندە جاسالعان. وسى سيمۆولعا وراي، الماتىداعى ۋنيۆەرسيادانىڭ ۇرانىنا «قاناتىڭدى كەڭ سەرپى!» تىركەسى تاڭدالدى.

XXVIII قىسقى دۇنيەجۇزىلىك ۋنيۆەرسيادا 2017 جىلى 28 قاڭتار مەن 8 اقپان ارالىعىندا وتەدى. الدىن الا مالىمەت بويىنشا، وعان FISU اليانسىنا كىرەتىن 50 ەلدەن بەس مىڭنان استام ستۋدەنت قاتىسادى. شامامەن ءۇش مىڭعا جۋىق ەرىكتىلەر قاتارىن جۇمىلدىرۋ جوسپارلانعان.

مەگاپوليستى ءىرى سپورتتىق شاراعا دايىنداۋداعى ينفراقۇرىلىمدىق بازا قىزمەتىن 2011 جىلى وتكەن 7-قىسقى ازيا ويىندارىنا ارناپ سالىنعان نىساندار اتقارىپ وتىر. اتاپ ايتقاندا، «سۇڭقار» حالىقارالىق شاڭعىدان سەكىرۋ كەشەنى، بالۋان شولاق اتىنداعى سپورت سارايى جانە الماتى وبلىسىنداعى شاڭعى-بياتلون ستاديونى ۋنيۆەرسيادا جارىستارىن قابىلدايدى. سپورت جارىستارى سونداي-اق «مەدەۋ» مۇز ايدىنىندا جانە «شىمبۇلاق» تاۋ-شاڭعىلى كۋرورتىندا وتەدى. ۋنيۆەرسيادا ءۇشىن قوسىمشا تاعى مۇز سارايى، مۇز ارەناسى جانە اتلەتتەر قالاشىعى سالىنادى.

ۋنيۆەرسيادا اياسىندا قازاقستاندا سپورتتىڭ 13 تۇرىنەن (8 مىندەتتى جانە 5 قوسىمشا) جارىستار جوسپارلانعان. مانەرلەپ سىرعاناۋ، شورت-ترەك، تاۋ شاڭعىسى سپورتى، سنوۋبوردينگ، بياتلون، شاڭعى جارىسى، شايبالى حوككەي، كەرلينگ مىندەتتى سپورت تۇرلەرىنە كىرەدى. ال قابىلداۋشى تاراپتىڭ ۇسىنىسى بويىنشا ەنگىزىلەتىن قوسىمشا سپورت تۇرلەرىنە شاڭعىمەن تۇعىردان سەكىرۋ، شاڭعى قوسسايىسى، فريستايل، كونكيمەن جۇگىرۋ سپورتى جانە بەندي كىرەدى.

قازاقستاننىڭ ستۋدەنتتىك قۇراماسىنىڭ سەگىز قىسقى ۋنيۆەرسياداعا قاتىسقان تاجىريبەسى بار. وسى ۋاقىت ارالىعىندا قازاقستان قۇراماسى قورجىنىنا 43 ناگرادا سالدى.