سوتقا 19 ادام تارتىلدى دەپ حابارلايدى ratel.kz. بۇل قازاقستاننىڭ سوت پروسەستەرىندە  ەشقاشان بولماعان دەيدى شىمكەنتتىڭ اۋداندىق ءال-فارابي سوتى.

ايىپتالىپ وتىرعان 19 ادام سوت ماتەريالى بويىنشا ۇيىمداسقان قىلمىستىق توپتىڭ مۇشەلەرى. ولار ۇرلىق جاسامادى، ادام ولتىرمەدى ءتىپتى قارجىنى دا جىمقىرمادى. قىلمىستىق توپ مەملەكەتتىك قىزمەتكە  ۇمىتكەرلەردىڭ ورنىنا تەست تاپسىرىپ وتىرعان.  ياعني، جالعان قۇجاتتار ارقىلى وزدەرىن باسقا ادام دەپ تانىسىرعان. ولار ءۇشىن تەست تاپسىرىپ، بۇل قىزمەتى ءۇشىن  اقشالاي سىياقى الىپ وتىردى. بۇل ادامداردىڭ كومەگىنە جۇگىنگەندەر «سىناقتان سۇرىنبەي ءوتىپ» مەملەكەتتىك قىزمەتتە ءوز قىزمەتتەرىنە كىرىسىپ كەتە بەرگەن.  

سوت زالى سوتقا تارتىلىپ وتىرعانداردىڭ تۋىستارىمەن تولدى

جالعان شەنەۋنىكتەردىڭ قىزمەتى سۇرانىسقا يە بولعانى سونشالىق، ولار بۇكىل قازاقستان بويىنشا «جۇمىس ىستەگەن». بەدەلدى قىزمەتكە ۇمىتكەرلەر ءبىلىم سىناعىنان وتۋگە ءوز قاۋقارلارى جەتپەگەن بولۋى كەرەك.  

تەستتەن ءساتتى وتكەندەرگە 2-3 مىڭ اقش دوللارىن بەرىلگەن ەكەن. 

ۇيىمداسقان قىلمىستىق توپ 2014 جىلدان بەرى جۇمىس ىستەپ كەلەدى. تەرگەۋ بارىسىندا ولاردىڭ 148 شەنەۋنىككە كومەكتەسكەنى بەلگىلى بولدى.

Ratel.kz اقپاراتىنا ساي لاۋازىمدى تۇلعالاردىڭ اراسىندا بەلگىلى ادامدار دا بار ەكەن. الايدا، سوت ولاردىڭ ەسىمىن جاريالاۋدان باس تارتتى، تەك جۇمىسىنان شىعارىلعانىن نەمەسە ءوز ەركىمەن كەتكەنى ايتىلدى.

ايىپتالىپ وتىرعانداردىڭ بارلىعى اقىلدى، ساۋاتتى، ءبىلىمدى، ءبىراق جۇمىسسىز. ۇقت باسشىسى ساكەن نوسەروۆ دءال وسىنداي ادامداردى ءوز توبىنا جيناقتاعان. سوت وعان 7 جىل كەستى. ءدال وسىنداي مەرزىمگە توپ ۇيىمداستىرۋشىسى  ءمادينا دوسجانوۆا دا كەسىلدى.

باسقالار ءۇشىن تەست تاپسىرعان 6 ايىپتالۋشى 5 جىلعا باس بوستاندىعىنان ايىرىلدى. قالعان 11ء-ى ءىس بۇرىندا بولعاندىقتان جاۋاپكەرشىلىكتەن بوساتىلدى.

سوت ۇكىمدى وقىعاننان كەيىن سوت زالىندا شۋ باستالدى. باس بوستاندىعىنان ايىرىلعانداردىڭ تۋىستارى جىلاپ، ءبىرى بالاعات سوزدەر ايتتى. اينەك بۋدكانىڭ ىشىندە وتىرعان بالاسىن اناسى قۇشاقتاۋعا تىرىستى. ايەل تەك قولىن سۇعىپ ۇلگەردى. بالاسى اناسىنىڭ قولىن ءسۇيىپ، ەكەۋى دە كوز جاسىنا ەرىك بەردى. ولاردىڭ بىر-بىرىمەن قوشتاسۋىنا ەشكىم كەدەرگى كەلتىرمەدى.

سوت شۋلى قىلمىستىق ءىستىڭ سوڭعى نۇكتەسىن قويسا دا،اتالمىش توپتىڭ كومەگىنە جۇگىنگەن مەملەكەتتىك قىزمەتكەرلەر نەلىكتەن جازادان قۇتىلىپ كەتكەنى جاۋاپسىز قالدى. ولار تەك قىزمەتىنەن عانا بوساتىلدى. سوت ولاردىڭ ەسىمدەرىن دە اتامادى.