بيىل الاش ۇلتتىق اۆتونومياسىنىڭ قۇرىلعانىنا 100 جىل تولدى. قازاقستان مۇسىلماندارى ءدىني باسقارماسى جانىنداعى عۇلامالار كەڭەسىنىڭ XV ماجىلىسىندە الاشوردا ۇكىمەتىنىڭ 100 جىلدىعىنا وراي رەسپۋبليكالىق عىلىمي-تاجىريبەلىك كونفەرەنسيا وتكىزۋ تۋرالى ۇسىنىس ءبىراۋىزدان ماقۇلداندى دەپ حابارلايدى قمبد باسپا ءسوز قىزمەتى.

«راسىندا، قازاقتىڭ تاريحى تاعىلىمعا تولى. مۇسىلماندىقتى مۇرات ەتكەن كەشەگى الاش قايراتكەرلەرىنىڭ ەل ىشىندەگى ساۋاتسىزدىقپەن ايانباي كۇرەسىپ، اعارتۋشىلىقپەن اينالىسۋى – وتكەن عاسىردىڭ ولمەس ونەگەسى، ەستەن كەتپەس ەرلىگى دەپ ايتار ەدىك. ولار ءبىلىمسىزدىڭ كۇنى قاراڭ ەكەنىن جەتە ءتۇسىندى. وزدەرى ءبىر ەمەس، بىرنەشە سالانى مەڭگەردى، بىرنەشە پاندەردى يگەردى. ولاردىڭ ءبىلىم جولىنداعى جىگەرى، حالىقتى ساۋاتتاندىرۋداعى ەڭبەگى، اۋىر سىناقتارعا توتەپ بەرگەن تاباندىلىعى – ءاربىر ازامات ءۇشىن ۇلكەن ۇلگى»، – دەپ اتاپ ءوتتى ماجىلىستە باس ءمۇفتي ەرجان قاجى مالعاجى ۇلى.

عىلىمي كونفەرەنسيادا الاش قايراتكەرلەرىنىڭ ءومىر جولى، ەڭبەكتەرى، تۋىندىلارى تۋرالى بايانداما جاسالىپ، ونى كىتاپ ەتىپ شىعارۋ جوسپارلاندى.