"ۆەليكايا ستەنا" قىتايلىق مۇناي كومپانياسى 2016 جىلى 499 ادامدى قىسقارتقان. ول ورتاشا جالاقى مەن الەۋمەتتىك تولەمدەر سوماسىن دا ازايتقان بولىپ شىقتى. اقتوبە وبلىسىنىڭ اكىمى بەردىبەك ساپاربايەۆ مۇنداي كاسىپورىندى جابۋ كەرەكتىگىن ايتتى  دەپ حابارلايدى "diapazon.kz".

"بارلىق جەردە  جالاقى ءوسىپ جاتىر، ال سىزدەردە قىسقارتۋ ءجۇرىپ جاتىر. بارلىق كاسىپورىن الەۋمەتتىك مىندەتتەرىن ورىندايدى، ال سىزدەر ورىندامايسىزدار. وندا كومپانيانى جابۋ كەرەك. بىزگە مۇنداي  كومپانيانىڭ قاجەتى جوق.  "ۆەليكايا ستەنانىڭ" ىسىنەن  باسقا ءىسىمىز جوق پا؟ قالعان 900 قىزمەتكەردى جۇمىسقا تۇرعىزامىز. ول قيىن ەمەس، ال كومپانيانى زاڭ اياسىندا جاۋىپ تاستاي الامىز"  دەدى ءوڭىر باسشىسى بەردىبەك ساپاربايەۆ.

 2016 جىلى جۇمىس كولەمىنىڭ از، ال شىعىن 1 ميلليارد 600 ميلليون تەڭگەگە جەتكەنىن ايتىپ اقتالدى كومپانيا  باسشىسى چجان سزيۋن.

الايدا ساپاربايەۆ "ۆەليكايا ستەنانىڭ" قۇرىلتايشىلاردان 100 ميلليون دوللار العانىن، بۇل قاراجاتتىڭ كاسىپورىننىڭ بارلىق كەرەك-جاراعىنا جەتىپ-ارتىلاتىنىن ايتتى. باس ديرەكتور بۇل قاراجاتتىڭ 24 ميلليون دوللارى بانككە قايتارىلعانىن، قالعان بولىگىنىڭ قىتايدا ساتىپ العان ماتەريالدىڭ تولەمى ەكەنىن ءتۇسىندىردى.

"ادامداردىڭ 60 پايىزىن قىسقارتساڭىزدار، جۇڭگو قىزمەتكەرلەردىڭ دە 60 پايىزىن قىسقارتىڭىزدار. قىسقارتۋ بولعاندا، ەڭ الدىمەن جۇڭگو ماماندارىن، باسقا شەتەلدىكتەردى قىسقارتىڭىز. ەكىنشىدەن، 3ء-شى جانە 4ء-شى كاتەگورياداعى جۇڭگو قىزمەتكەرلەرىن جۇمىسقا الۋدىڭ قاجەتى جوق، قىتايدان كەلەتىن ماماندار 1ء-شى جانە 2ء-شى ساناتتاعى بولۋى كەرەك" - دەدى وبلىس اكىمى.

"كومپانياداعى جۇمىسشىلاردىڭ سانى - 900، ونىڭ 66-ى قىتايلىق. ياعني 7 پايىزدى قۇرايدى. ءبىز 3ء-شى جانە 4ء-شى كاتەگورياداعى جۇڭگو ماماندارىن نەگە الامىز؟ سەبەبى بارلىق قۇرال-جابدىعىمىز قىتايدان، ولار ىستەن شىققاندا، اقاۋدى جويۋعا جۇڭگو ماماندارىنىڭ مۇمكىندىكتەرى كوبىرەك" - دەدى چجان سزيۋن.

ساپاربايەۆتىڭ "مۇنداي ماماندار قازاقستاندا جوق پا؟" دەگەن سۇراعىنا جۇڭگو كومپانياسىنىڭ باسشىسى "ءبىز سىزدەردىڭ مامانداردى وقىتىپ كەلدىك" دەپ جاۋاپ بەردى. 

"وقىتساڭىزدار، ولار قايدا؟ جۇمىسقا تارتپاساق، نە ءۇشىن وقىتتىڭىزلار - دەپ سۇراعان اكىم كەيىنگى ءسوزىن ءوز قولاستىنداعىلارعا قازاق تىلىندە جالعادى. - بۇلار ءبىزدىڭ مامانداردى وقىتتىق دەي مە؟ ولار قايدا؟ قايدا قاراپ جۇرسىزدەر؟ ەندەشە بىلاي،  3ء-شى جانە 4ء-شى كاتەگورياداعى جۇڭگو ماماندارىنا رۇقسات بەرمەڭىزدەر! بۇدان ەشتەڭە شىقپاسا، ۆيزانى دا بەرمەيمىز" دەپ كەسىپ ايتتى بەردىبەك ساپاربايەۆ. 

وسىدان كەيىن جۇڭگو كومپانياسىنىڭ باسشىسىنان قىسقارتۋعا ۇشىراعان قانشا قىزمەتكەردىڭ "ۆەليكايا ستەناعا" ورالاتىنى جايلى سۇرالدى.

چجان سزيۋن ۋاقىت بەرۋدى سۇرادى. "اقپاندا ەكى بۇرعىلاۋدى اشامىز، ياعني 114 ادام جۇمىسقا ورالادى. 2017 جىلى جۇمىس كولەمى ماكسيمالدىق دەڭگەيگە جەتكەندە، جۇمىسقا 800 ادام تارتىلادى. ءقازىر 600 ادام جۇمىس ىستەيدى. بارلىق قىزمەتكەردى قايتارامىز دەپ ۋادە بەرە المايمىن، ءبىراق سىزدەن ۋاقىبەرۋىڭىزدى سۇرايمىز"- دەدى ول.

ساپاربايەۆ اقتوبەلىك بيلىكتىڭ بايلانىسى جاقسى ەكەنىن، سوندىقتان "ۆەليكايا ستەنا" باسقا وڭىرلەرمەن جۇمىس ىستەي باستاسا، چجان سزيۋنگە قولداۋ كورسەتۋگە ۋادە ەتتى. ناقتىراق ايتقاندا، اتىراۋ، ماڭعىستاۋ جانە باتىس قازاقستان وبلىستارى، سونداي-اق، رەسەي وڭىرلەرى. الايدا اكىم كومپانيانى جابۋ ماسەلەسىن قايتا كوتەردى.

"قۇرىلتايشىلارعا حات جولداۋ كەرەك. كاسىپورىننىڭ ەكونوميكالىق جاعدايىن جاقسارتپاسا، قۇزىرلى ورگاننىڭ كومەگىمەن بانكروتتىققا دەيىن بارۋ ءۇشىن شارا قولدانامىز. بىزگە ماسەلەسى شاش ەتەكتەن  كومپانيانىڭ قاجەتى جوق. اقتوبە وبلىسىنىڭ ەكونوميكاسى بۇل كومپانياعا تاۋەلدى ەمەس. ءقازىر 900 ادامنىڭ 422ء-سى بۇل كومپانيادا جۇمىس ىستەمەيدى. قالعان 500 ادامعا  جۇمىس تاۋىپ بەرە الامىز"  دەدى  بەردىكبەك ساپاربايەۆ.