اقتوبە وبلىسىنىڭ بيلىگى 2016 جىلى 499 ادامدى قىسقارتقان "ۆەليكايا ستەنا" قىتايلىق مۇناي كومپانياسىنا قاتاڭ تالاپتار قويدى. بۇل كومپانيا ورتاشا جالاقى مەن الەۋمەتتىك تولەمدەر سوماسىن دا ازايتقان بولىپ شىقتى. ءوڭىر باسشىسى بەردىبەك ساپاربايەۆ كاسىپورىندى جابۋ كەرەكتىگىن ايتتى، - دەپ حابارلايدى "tengrinews.kz".

"بارلىق جاقتا جالاقى ءوسىپ جاتىر، ال سىزدەردە قىسقارتۋ. بارلىق كاسىپورىن الەۋمەتتىك مىندەتتەرىن ورىنداپ كەلەدى، ال سىزدەر ورىندامايسىزدار. وندا سىزدەردىڭ كومپانيانى جابۋ كەرەك. بىزگە پروبلەمالى كومپانيانىڭ قاجەتى جوق. وسى "ۆەليكايا ستەنانىڭ" ىسىمەن اينالىساتىنداي باسقا ءىسىمىز جوق پا؟ قالعان 900 قىزمەتكەردى جۇمىسقا تۇرعىزامىز، بۇل پروبلەما ەمەس، ال كومپانيانى زاڭ اياسىندا جاۋىپ تاستايمىز"، - دەدى اكىم.

ال ج ش س باسشىسى چجان سزيۋن ءوز كەزەگىندە كومپانيانىڭ قىزمەتكەرلەردى نە ءۇشىن قىسقارتقانىن ايتىپ، اقتالدى. "قىزمەتكەرلەردىڭ جالاقىسى كومپانيانىڭ بارلىق شىعىنىنىڭ 28 پايىزى. بۇرعىلاۋ بويىنشا ماتەريالدىق شىعىن، ونىڭ ىشىندە ديزەل وتىنى - 30 پايىز. تاعى دا 30 پايىز بۋ قوندىرمالارىنىڭ امورتيزاسياسىنا جۇمسالادى. سونداي-اق، كولىك شىعىندارى بار. 2016 جىلى جۇمىس كولەمى از بولعاندىقتان، شىعىنىمىز 1 ميلليارد 600 ميلليون تەڭگە بولدى"، - دەپ مالىمدەدى ول.

ساپاربايەۆ "ۆەليكايا ستەنانىڭ" قۇرىلتايشىلاردان 100 ميلليون دوللار العانىن، بۇل قاراجاتتىڭ كاسىپورىننىڭ بارلىق كەرەك-جاراعىنا جەتىپ-ارتىلاتىنىن ايتتى. باس ديرەكتور بولسا بۇل قاراجاتتىڭ 24 ميلليون دوللارى بانككە قايتارىلعانىن، قالعان بولىگىنىڭ قىتايدا ساتىپ العان ماتەريالدىڭ تولەمى ەكەنىن ايتتى.

"ادامداردىڭ 60 پايىزىن قىسقارتساڭىزدار، جۇڭگو قىزمەتكەرلەردىڭ دە 60 پايىزىن قىسقارتىڭىزدار. قىسقارتۋ بولعاندا، ءبىرىنشى كەزەكتە جۇڭگو ماماندارىن، باسقا شەتەلدىكتەردى قىسقارتىڭىز. ەكىنشىدەن، 3ء-شى جانە 4ء-شى كاتەگورياداعى جۇڭگو قىزمەتكەرلەرىن جۇمىسقا الۋىڭ قاجەتى جوق، قىتايدان كەلەتىن مامانداردىڭ كاتەگورياسى 1ء-شى جانە 2ء-شى بولۋى كەرەك"، - دەدى وبلىس اكىمى.

"ءبىرىنشى ءوزىڭىز قاراڭىز، كومپانياداعى جۇمىسشىلاردىڭ سانى - 900 ادام، ولاردىڭ ىشىندە 66 ادام، ياعني 7 پايىزى. ءبىز 3ء-شى جانە 4ء-شى كاتەگورياداعى جۇڭگو ماماندارىن نەگە الامىز؟ سەبەبى بارلىق قۇرال-جابدىعىمىز قىتايدان، ولار ىستەن شىققاندا، اقاۋدى جويۋعا جۇڭگو ماماندارىنىڭ مۇمكىندىكتەرى كوبىرەك"، - دەپ جاۋاپ بەردى چجان سزيۋن.

ساپاربايەۆتىڭ "مۇنداي ماماندار قازاقستاندا جوق پا؟" دەگەن سۇراعىنا جۇڭگو كومپانياسىنىڭ باسشىسى بىلاي دەپ جاۋاپ قاتتى: "وسى جىلدار بويى ءبىز سىزدەردىڭ مامانداردى وقىتىپ كەلدىك".

"وقىتساڭىزدار، ولار قايدا؟ جۇمىسقا تارتپاساق، نە ءۇشىن وقىتتىڭىزلار - دەپ سۇراعان اكىم كەيىنگى ءسوزىن ءوز قولاستىنداعىلارعا قازاق تىلىندە جالعادى. - بۇلار ءبىزدىڭ مامانداردى وقىتتىق دەي مە؟ ولار قايدا؟ قايدا قاراپ جۇرسىزدەر؟ ەندەشە بىلاي: 3ء-شى جانە 4ء-شى كاتەگورياداعى جۇڭگو ماماندارىنا رۇقسات بەرمەڭىزدەر! بۇدان ەشتەڭە شىقپاسا، ۆيزانى دا بەرمەيمىز".

وسى ديالوگتان كەيىن جۇڭگو كومپانياسىنىڭ باسشىسىنان قىسقارتۋعا ۇشىراعان قانشا قىزمەتكەردىڭ "ۆەليكايا ستەناعا" ورالاتىنى جايلى سۇرالدى.

چجان سزيۋن "ۋاقى بەرۋدى" سۇرادى. "اقپاندا ەكى بۇرعىلاۋدى اشامىز، ياعني 114 ادام جۇمىسقا ورالادى. ەسەپتەپ كورسەك، 2017 جىلى جۇمىس كولەمى ماكسيمالدىق دەڭگەيگە جەتكەندە، جۇمىستا 800 ادام بولادى. الايدا ازىرشە جۇمىس كولەمى ورتاشا، 600 ادام جۇمىس ىستەيدى. بارلىق قىزمەتكەردى قايتارامىز دەپ ۋادە بەرە المايمىن، ءبىراق سىزدەن ۋاقىت سۇرايمىز"، - دەدى ول.

ساپاربايەۆ اقتوبەلىك بيلىكتىڭ بايلانىسى جاقسى ەكەنىن، سوندىقتان "ۆەليكايا ستەنا" باسقا وڭىرلەرمەن جۇمىس ىستەي باستاسا، چجان سزيۋنگە قولداۋ كورسەتۋگە ۋادە ەتتى. ناقتىراق ايتقاندا، اتىراۋ، ماڭعىستاۋ جانە باتىس قازاقستان وبلىستارى، سونداي-اق، رەسەي وڭىرلەرى. الايدا اكىم كومپانيانى جابۋ ماسەلەسىن قايتا كوتەردى.

"قۇرىلتايشىلارعا حات جولداۋ كەرەك. كاسىپورىننىڭ ەكونوميكالىق جاعدايىن جاقسارتپاسا، قۇزىرلى ورگاننىڭ كومەگىمەن بانكروتتىققا دەيىن بارۋ ءۇشىن شارا قولدانامىز. بىزگە پروبلەماسى كوپ كومپانيانىڭ قاجەتى جوق. اقتوبە وبلىسىنىڭ ەكونوميكاسى بۇل كومپانياعا تاۋەلدى ەمەس. ءقازىر 900 ادامنىڭ 422ء-سى بۇل كومپانيادا جۇمىس ىستەمەيدى. قالعان 500 ادامعا ءبىز جۇمىس تاۋىپ بەرەمىز"، - دەدى وبلىس باسشىسى قولاستىنداعىلارعا.