بۇل تۋرالى Caravan.kz مەديا-پورتالى حابارلادى.

امانگەلدى باتىربەكوۆتىڭ مۇنداي شاراسىزدىققا بارۋىنا سىني ماقالالارى ءۇشىن ءبىر جىلدا ءۇش مارتە سوتتالىپ، ءۇش مارتە اقتالۋى جانە قۋدالاۋعا ءتۇسۋى سەبەپ بولىپ وتىر.

جاپا شەككەن ءجۋرناليستىڭ ايتۋىنشا، وقيعا 2015 جىلى 9 قاڭتار كۇنى وبلىس پروكۋرورى گەنەرال يبراhيم يمانوۆ جايلى «گەنەرالعا ەكى سويلەۋگە بولا ما نەمەسە اي-عاسىر داۋىنا قاي عاسىردا نۇكتە قويىلدى؟» دەگەن ماقالادان باستالىپتى. ءبىرشاما ۋاقىتتان سوڭ ءتىلشى «ادىلەت» گازەتىنە «زاڭنان دا، قۇدايدان دا نەمەسە جازىقسىزداردىڭ جان ايقايى باس پروكۋراتۋراعا جەتە مە؟» دەگەن ماقالا جازادى. وندا قاراقشىلىق قىلمىسى بويىنشا سوتتالىپ كەتكەن ەكى ادامعا اراشا ىزدەگەن.

وسى ماقالادان سوڭ سارىعاش اۋدانى پروكۋرورىنىڭ ورىنباسارى ساپاروۆ جۋرناليست وزىنە جالا جاپتى دەپ سوتقا ارىزدانادى. ايتسەدە امانگەلدى باتىربەكوۆتىڭ ايتۋىنشا، ساپاروۆ پروكۋرور رەتىندە ىشكى ىستەر ورگانىنا شاعىم ءتۇسىرۋى ءتيىس ەدى. ءبىراق ول نۇرلان سايلاۋ ۇلى رەتىندە سوتقا جەكە شاعىم تۇسىرگەن. سارىعاش اۋداندىق سوتىنىڭ سۋدياسى بەرىك قايىپوۆ ونى نەگىزگە الماستان 1 جىل 6 ايعا سوتتاپتى. ءبىراق ءۇش ايدان كەيىن اپەللياسيالىق سوت ول ۇكىمدى بۇزىپ، باتىربەكوۆتى اقتاپ، سوت زالىنان بوساتادى. ال پروكۋروردىڭ ءىس-قۇجاتتارىن وبلىستىق ىشكى ىستەر دەپارتامەنتىنە جۇمسايدى.

مۇنىمەن شەكتەلمەگەن باتىربەكوۆ ءبىر ايدان سوڭ تاعى ءبىر ماقالاسى بويىنشا "جالا جاپتى" دەگەن ايىپپەن ەكىنشى مارتە 2 جىلعا سوتتالعان. ۇكىمدى تاعى دا ءبىرىنشى ءىستى قاراعان سۋديا بەرىك قايىپوۆ شىعارادى.

«ءسىز ءىستى قاراۋعا قۇقىڭىز جوق. ءبىر مارتە مەنى زاڭسىز سوتتادىڭىز، دەگەن قارسىلىعىما قاراعان جوق»،- دەيدى ا. باتىربەك

ءبىراق كوپ ۇزاماي ءتىلشى قارسى ارىز نەگىزىندە قايتادان اقتالادى.

ايتسەدە ءبىرىنشى ىستەگى پروكۋرور نۇرلان ساپاروۆتىڭ ارىزى بويىنشا قايتادان تەرگەۋ باستالىپ، تاعى دا ءۇش كۇنگە قامالادى. ارتىنشا التى اي ءۇيقاماقتا وتىرادى. سوتتا ەكى باپ بويىنشا ايىپ تاعىلادى. دەگەنمەن، سوت پروسەسى بارىسىندا ق ر قىلمىستىق كودەكسىنىڭ 419-بابى بويىنشا تاعىلعان ايىپ دالەلدەنبەگەندىكتەن تولىق اقتالىپ شىقتى. ال 411-باپ بويىنشا تاعىلعان ايىپتان جارتىلاي اقتالادى. 

ءبىر جىلدا ءۇش مارتە سوتتالىپ، ءۇش مارتە اقتالىپ شىققان امانگەلدى باتىربەكوۆ ەرتەڭ استانادا باسپا ءسوز ءماسليحاتىن وتكىزبەكشى. ال 1-اقپان كۇنى ەلىمىزدىڭ باس پروكۋراتۋراسىندا قابىلداۋدا بولۋى ءتيىس.

«ولار ۇنەمى قابىلداۋدان باس تارتىپ كەلە جاتىر. بۇل جولى تاعى باس تارتسا ءوز ءوزىمدى ورتەيمىن» دەيدى امانگەلدى باتىربەكوۆ.